મુંબઈ, તા.18 : વૈશ્વિક સ્તરે વધતા ભૂ-રાજકીય તણાવ અને ક્રૂડ ઓઇલના ભાવમાં સતત થઈ રહેલા વધારાની સીધી માછી અસર ભારતીય ચલણ પર જોવા મળી રહી છે. મંગળવારે વિદેશી વિનિમય બજાર (ફોરેક્સ માર્કેટ) માં યુએસ ડોલર સામે રૂપિયો ૭ પૈસા ઘટીને ૯૫.૬૮ (કામચલાઉ) ની નીચલી સપાટીએ બંધ રહ્યો હતો. મધ્ય પૂર્વમાં ચાલી રહેલી રાજકીય અસ્થિરતા અને અમેરિકી ડોલરની મજબૂત સ્થિતિને કારણે ભારતીય રૂપિયા પર વેચવાલીનું દબાણ સતત વધી રહ્યું છે.

ડોલર સામે રૂપિયાની હલચલ:

ઈન્ટરબેંક ફોરેક્સ માર્કેટમાં અમેરિકન ગ્રીનબેક (ડોલર) સામે રૂપિયો ૯૫.૬૮ પર ખુલ્યો હતો. દિવસ દરમિયાન ટ્રેડિંગ સત્રમાં રૂપિયો ૯૫.૬૪ થી ૯૫.૬૯ ની રેન્જમાં અથડાતો રહ્યો હતો અને અંતે અગાઉના ૯૫.૬૧ ના બંધ સ્તર સામે ૭ પૈસાના ઘટાડા સાથે ૯૫.૬૮ પર સ્થિર થયો હતો. વિદેશી હૂંડિયામણના નિષ્ણાતોના જણાવ્યા મુજબ, યુએસ અને ઈરાન વચ્ચેના સોદામાં વિલંબ અને કાચા તેલની વધતી કિંમતો આગામી દિવસોમાં પણ રૂપિયાની ચાલને પ્રભાવિત કરશે.

ક્રૂડ ઓઇલ અને વિદેશી રોકાણકારોની વેચવાલી:

મોતીલાલ ઓસ્વાલ ફાઇનાન્શિયલ સર્વિસીસના વેલ્થ મેનેજમેન્ટ રિસર્ચ હેડ સિદ્ધાર્થ ખેમકાના જણાવ્યા અનુસાર, બ્રેન્ટ ક્રૂડ પ્રતિ બેરલ $૯૦ થી ઉપર પહોંચી ગયું છે. 'સ્ટ્રેટ ઓફ હોર્મુઝ' માર્ગ પરનો વિવાદ ઉકેલાયો ન હોવાથી ક્રૂડ ઓઇલના ભાવ ભારતીય રૂપિયા, ફુગાવા (મોંઘવારી) અને વિદેશી મૂડીપ્રવાહ માટે ચિંતાનો વિષય બન્યા છે. આ ઉપરાંત, વિદેશી સંસ્થાકીય રોકાણકારો (FIIs) એ સોમવારે જ ₹૨,૫૩૫.૧૦ કરોડના શેર વેચી માર્યા હતા, જે છેલ્લા ત્રણ અઠવાડિયામાં સૌથી મોટી વેચવાલી હતી.

શેરબજાર પર પણ માડી અસર:

ચલણ માર્કેટમાં ઘટાડાની સાથે ભારતીય શેરબજારમાં પણ મોટો કડાકો જોવા મળ્યો હતો. મંગળવારે સેન્સેક્સ ૪૯૨.૭૦ પોઈન્ટ ઘટીને ૭૭,૨૩૫.૪૬ પર અને નિફ્ટી ૧૩૨.૭૫ પોઈન્ટ ઘટીને ૨૪,૧૫૪.૯૦ ની સપાટીએ બંધ રહ્યો હતો. જોકે, નિષ્ણાતોના મતે ભારતના મજબૂત આંતરિક અર્થતંત્ર અને સ્થિર નીતિગત ટેકાને કારણે મધ્યમ ગાળામાં પરિસ્થિતિ સુધરી શકે છે.