વોશિંગ્ટન ડીસી, તા.૧૮: ઉત્તર કોરિયાના આક્રમક વલણ અને કોરિયન દ્વીપકલ્પ પર ચાલી રહેલા રાજકીય તણાવ વચ્ચે યુએસ પ્રમુખ ડોનાલ્ડ ટ્રમ્પે ઉત્તર કોરિયાના નેતા કિમ જોંગ ઉન સાથેના પોતાના ગાઢ સંબંધોને લઈને એક અત્યંત મહત્વપૂર્ણ નિવેદન આપ્યું છે. ટ્રમ્પે દાવો કર્યો છે કે કિમ જોંગ ઉન તેમની સાથે હંમેશા "ખૂબ જ આદરપૂર્વક" વર્તે છે અને તેમનો આ ડિપ્લોમેટિક અભિગમ કોરિયન દ્વીપકલ્પ પર શાંતિ અને સુરક્ષા સ્થાપિત કરવા માટે અત્યંત અસરકારક સાબિત થઈ રહ્યો છે.

બાઇડેન અને ઓબામાને કિમ પસંદ કરતા નહોતા:

વોશિંગ્ટનમાં પત્રકારો સાથેની ખાસ વાતચીતમાં પ્રમુખ ટ્રમ્પે યાદ અપાવ્યું હતું કે તેઓ અગાઉ બે મહત્વપૂર્ણ શિખર સંમેલનો દરમિયાન કિમ જોંગ ઉનને મળ્યા હતા અને તેમની સાથે લાંબો સમય વિતાવ્યો હતો. ટ્રમ્પે જણાવ્યું હતું કે, "હું કિમ જોંગ ઉનને સારી રીતે સમજું છું અને તેઓ પણ મને ખૂબ સરસ રીતે સમજે છે. ભૂતપૂર્વ પ્રમુખ જો બાઇડેન કે બારાક ઓબામા પ્રત્યે તેમને ભારે અનાદર હતો, પરંતુ મારી સાથે તેમના સંબંધો અત્યંત સૌહાર્દપૂર્ણ રહ્યા છે."

સંયુક્ત સૈન્ય કવાયતોમાં મોટા કાપની આકરી સૂચના:

અમેરિકી પ્રમુખે ઉત્તર કોરિયા સાથેના સંબંધો સુધારવાની દિશામાં વધુ એક મોટું પગલું ભરતા યુએસ પ્રમુખે ટ્રુથ સોશિયલ (Truth Social) પર પોસ્ટ કરી જણાવ્યું હતું કે તેઓ દક્ષિણ કોરિયા સાથે થઈ રહેલી સંયુક્ત સૈન્ય કવાયતોથી બિલકુલ ખુશ નથી. તેમણે આ કવાયતોને અત્યંત મોંઘી અને ઉત્તર કોરિયા માટે અયોગ્ય ઉશ્કેરણીજનક સંકેત આપનારી ગણાવી હતી.

વોર સેક્રેટરી પીટ હેગસેથને સ્પષ્ટ આદેશ:

ટ્રમ્પે ખુલાસો કર્યો હતો કે આ સૈન્ય કવાયતોને હવે સંપૂર્ણપણે રદ કરવી સમયની દ્રષ્ટિએ શક્ય નથી, પરંતુ તેમણે પોતાના યુદ્ધ સચિવ (War Secretary) પીટ હેગસેથને દક્ષિણ કોરિયા સાથેની આ સંયુક્ત સૈન્ય કવાયતોના કદ અને વ્યાપમાં "નોંધપાત્ર ઘટાડો" કરવાના આકરા આદેશ આપી દીધા છે. ટ્રમ્પના આ નિર્ણયથી વૈશ્વિક રાજકારણમાં નવી ચર્ચાઓ જાગી છે.