નવી દિલ્હી :  વૈશ્વિક ઊર્જા બજારમાં ફરી એકવાર મોટી અસ્થિરતા સર્જાઈ છે. યુનાઇટેડ સ્ટેટ્સ અને ઈરાન વચ્ચે જૂન મહિનામાં થયેલો ૬૦ દિવસનો શાંતિ કરાર ૧૭ ઓગસ્ટના રોજ પૂર્ણ થયા બાદ કોઈ નવો કરાર ન થતાં વૈશ્વિક ક્રૂડ ઓઇલના ભાવમાં તીવ્ર ઉછાળો આવ્યો છે. બ્રેન્ટ ક્રૂડ ફ્યુચર્સ પ્રતિ બેરલ $૯૦.૯૪ ની સપાટી વટાવી ચૂક્યું છે, જ્યારે યુએસ વેસ્ટ ટેક્સાસ ઇન્ટરમીડિયેટ (WTI) પણ વધીને $૮૫.૦૩ પર પહોંચી ગયું છે. કરારની સમયમર્યાદા લંબાવવાનો યુએસ પ્રમુખ ડોનાલ્ડ ટ્રમ્પના સ્પષ્ટ ઇનકાર બાદ મધ્ય પૂર્વમાં સૈન્ય તણાવ ચરમસીમાએ પહોંચ્યો છે.

આ વધારા પાછળનું સૌથી મોટું કારણ પર્શિયન ગલ્ફમાં આવેલો વ્યૂહાત્મક 'હોર્મુઝ સ્ટ્રેટ' દરિયાઈ માર્ગ છે, જ્યાંથી વિશ્વના કુલ તેલ પુરવઠાનો પાંચમો ભાગ પસાર થાય છે. ઈરાને આ વિસ્તારમાં આક્રમક વલણ અપનાવ્યું છે અને યુએસ નૌકાદળની વધતી ગતિવિધિઓને કારણે સપ્લાય ચેઇન ખોરવાઈ જવાની આશંકા ઉભી થઈ છે. ING ના નાણાકીય વિશ્લેષકોના જણાવ્યા મુજબ, શાંતિ વાટાઘાટો નિષ્ફળ જવાથી અને હોર્મુઝ સ્ટ્રેટમાં વધતા સુરક્ષા જોખમોના કારણે ક્રૂડ ઓઇલના ભાવને સતત બળ મળી રહ્યું છે, જે નજીકના ભવિષ્યમાં ઘટવાના એંધાણ નથી.

આંતરરાષ્ટ્રીય સ્તરે ક્રૂડ ઓઇલના ભાવમાં થઈ રહેલો આ ભડકો ભારત જેવા વિશાળ આયાતકાર દેશ માટે અત્યંત ચિંતાજનક છે. ભારત પોતાની જરૂરિયાતનું ૮૫% થી વધુ કચું તેલ વિદેશથી આયાત કરે છે, જેથી તેલ મોંઘું થતાં દેશનું આયાત બિલ સીધું વધી જશે. પેટ્રોલીયમ પેદાશોના ભાવ વધવાથી માલસામાનનો પરિવહન ખર્ચ વધશે, જેની સીધી અસર પેટ્રોલ-ડીઝલના ભાવ તેમજ દૈનિક જરૂરિયાતની શાકભાજી અને ખાદ્યચીજો પર પડશે અને ભારતીય ગ્રાહકોને ફરી એકવાર મોંઘવારીનો માર સહન કરવો પડી શકે છે.