ઈન્દોર : દેશના સૌથી સ્વચ્છ અને મોડેલ શહેર ગણાતા મધ્યપ્રદેશના ઈન્દોરમાંથી માળખાગત સુવિધાઓ અને બાંધકામની ગુણવત્તા પર સવાલો ઊભા કરતી એક ચોંકાવનારી ઘટના સામે આવી છે. ઈન્દોરમાં આશરે રૂપિયા ૪૦ કરોડના વિરાટ ખર્ચે તાજેતરમાં બનેલા એક મુખ્ય રસ્તા પર અચાનક મોટી તિરાડો પડી જતાં અને નીચેથી પાણી વહેવા લાગતાં સ્થાનિક રહીશો તથા વાહનચાલકોમાં ભારે અફરાતફરી મચી ગઈ છે. આ ઘટના બાદ વિપક્ષી પાર્ટી કોંગ્રેસે વડાપ્રધાન નરેન્દ્ર મોદી અને રાજ્યની ભાજપ સરકારના 'વિકાસ'ના દાવાઓ સામે મોરચો મંડ્યો છે.

સોશિયલ મીડિયા પર પીએમ મોદીના ભાષણનો વીડિયો સંપાદિત કરી વળતો પ્રહાર:

કોંગ્રેસે પોતાના સત્તાવાર સોશિયલ મીડિયા હેન્ડલ 'X' પર એક સંપાદિત વીડિયો શેર કરીને ભાજપ પર આકરા પ્રહારો કર્યા છે. આ વીડિયોના એક ભાગમાં વડાપ્રધાન નરેન્દ્ર મોદી એવું કહેતા સંભળાય છે કે, "અપના ઈન્દોર સિર્ફ દેશ મેં હી નહીં બલ્કી પૂરી દુનિયા મેં લાજવાબ હૈ", જ્યારે વીડિયોના બીજા જ ભાગમાં તૂટેલો રસ્તો અને તેની નીચેથી ધસમસતા પાણીના પ્રવાહના દ્રશ્યો દેખાય છે. કોંગ્રેસે આ વીડિયો સાથે તીખો કટાક્ષ કરતા કેપ્શન લખ્યું છે કે, "ભાજપનો 'ભ્રષ્ટાચાર' જમીન ફાડીને બહાર આવ્યો છે."

માત્ર એક વર્ષ જૂના રસ્તાની ગુણવત્તા પર સવાલો:

વાયરલ થયેલા દ્રશ્યોમાં સ્પષ્ટ જોઈ શકાય છે કે જમીનમાંથી પાણીનો ભારે પ્રવાહ બહાર આવી રહ્યો હતો, જેના કારણે રસ્તાનો મોટા ભાગનો ડામર ઉખડી ગયો હતો અને મોટી તિરાડો પડી ગઈ હતી. પરિસ્થિતિ એટલી ગંભીર હતી કે સામેથી આવતા વાહનચાલકોએ પોતપોતાના વાહનો પાછા વાળવા પડ્યા હતા. કોંગ્રેસે દાવો કર્યો છે કે આ રસ્તો માત્ર એક વર્ષ પહેલાં જ લાખો-કરોડોના ખર્ચે બનાવવામાં આવ્યો હતો. વિપક્ષે સવાલ ઉઠાવ્યો છે કે આટલા ટૂંક સમયમાં જ સરકારી નાણાંથી બનેલા માર્ગની આવી દુર્દશા કેવી રીતે થઈ શકે?

ઈન્દોરના નાગરિક માળખાકીય વિકાસ પર તપાસનો ધમધમાટ:

સ્વચ્છતા અને શહેરી સુવિધાઓમાં સતત દેશમાં પ્રથમ નંબરે રહેતા ઈન્દોર શહેર માટે આ ઘટના અત્યંત શરમજનક સાબિત થઈ રહી છે. રૂ. ૪૦ કરોડના ખર્ચે બનેલા પ્રોજેક્ટમાં થયેલા આ નુકસાનથી સ્થાનિક તંત્ર અને કોન્ટ્રાક્ટરોની મિલીભગત તેમજ ભ્રષ્ટાચારની પોલ ખુલ્લી પડી ગઈ છે. આ ઘટનાને પગલે હવે સ્થાનિક નાગરિક માળખાકીય વિકાસ પ્રોજેક્ટ્સની ગુણવત્તા અને બાંધકામના ધોરણો અંગે ઉચ્ચ સ્તરીય તપાસની માગ ઉઠી છે.