નવી દિલ્હી, તા.19: ભારતીય જનતા પાર્ટી (BJP) એ પોતાની નવી રાષ્ટ્રીય ટીમની જાહેરાત કરી દીધી છે. નવીન રાષ્ટ્રીય પ્રમુખ નીતિન નવીનની આ નવી ટીમમાં અનેક જૂના અને અનુભવી નેતાઓને મહત્વપૂર્ણ રાજ્ય સંગઠનોની જવાબદારીઓ સોંપવામાં આવી છે. પરંતુ આ વ્યાપક સંગઠનાત્મક ફેરબદલમાં બે સૌથી જાણીતા ચહેરાઓ—ઓડિશાના પૂર્વ કેન્દ્રીય મંત્રી ધર્મેન્દ્ર પ્રધાન અને બિહારના પૂર્વ મંત્રી મંગલ પાંડે—ની ગેરહાજરીએ રાજકીય વર્તુળોમાં ભારે ચર્ચા જગાડી છે. સંગઠન અને સરકાર બંનેમાંથી આ બંને નેતાઓ બહાર ફેંકાઈ જતાં તેમના ભવિષ્ય અંગે અનેક તર્ક-વિતર્ક સેવાઈ રહ્યા છે.

ઉલ્લેખનીય છે કે, નીટ (NEET) અને અન્ય સ્પર્ધાત્મક પરીક્ષાઓના પેપર લીક વિવાદ તથા વિદ્યાર્થી આંદોલન બાદ ધર્મેન્દ્ર પ્રધાને 25 જુલાઈના રોજ કેન્દ્રીય શિક્ષણ મંત્રી પદેથી રાજીનામું આપવું પડ્યું હતું. ત્યારબાદ તેમનો વધારાનો પ્રભારી પ્રહલાદ જોશીને સોંપાયો હતો. એવું માનવામાં આવતું હતું કે સરકારમાંથી બહાર આવ્યા બાદ ધર્મેન્દ્ર પ્રધાનને સંગઠનમાં કોઈ મોટી જવાબદારી સોંપાશે. પરંતુ 17 ઓગસ્ટના રોજ જાહેર થયેલી નીતિન નવીનની નવી ટીમમાં તેમનું નામ ગાયબ હતું. બીજી તરફ, બિહારમાં સમ્રાટ ચૌધરી મુખ્યમંત્રી બન્યા બાદ નીતિશ સરકારના પૂર્વ આરોગ્ય મંત્રી મંગલ પાંડેને પણ કેબિનેટમાંથી બાકાત રાખવામાં આવ્યા હતા અને હવે સંગઠનમાં પણ તેમને કોઈ જગ્યા મળી નથી.

ભાજપે આગામી મહત્વની વિધાનસભા ચૂંટણીઓને ધ્યાનમાં રાખીને ઉત્તર પ્રદેશ, પંજાબ અને ગુજરાત જેવા રાજ્યોમાં નવા પ્રભારીઓની નિમણૂક કરી દીધી છે. મહાસચિવ વિનોદ તાવડેને ઉત્તર પ્રદેશના પ્રભારી, સતીશ પુનિયાને પંજાબના અને તરુણ ચુઘને ગુજરાતના પ્રભારી તરીકે કમાન સોંપવામાં આવી છે. વર્ષ 2027 માં ઉત્તર પ્રદેશ, પંજાબ, ગુજરાત, ઉત્તરાખંડ અને ગોવા સહિત સાત રાજ્યોમાં વિધાનસભા ચૂંટણીઓ યોજાવાની છે. આવી સ્થિતિમાં પ્રધાન અને પાંડે બંને વરિષ્ઠ નેતાઓને કોઈ રાજ્યના 'ચૂંટણી પ્રભારી' બનાવીને ફરી સક્રિય કરાશે કે પછી તેમનો આ રાજકીય વનવાસ લાંબો ચાલશે, તેના પર સૌની નજર ટકેલી છે.