ન્યૂ યોર્ક:  કોંગ્રેસ પાર્ટીના પૂર્વ અધ્યક્ષ સોનિયા ગાંધીએ પોતાની આગામી આત્મકથા "બિલંગિંગ: અ જર્ની ઓફ લવ" (Belonging: A Journey of Love) ના માધ્યમથી પોતાના અત્યંત અંગત અનુભવો અને રાજકીય સફરના અજાણ્યા પાસાઓ પરથી પડદો ઊંચક્યો છે. ન્યૂ યોર્કમાં અલ્ફ્રેડ એ. નોફ  પબ્લિશિંગ હાઉસ દ્વારા જાહેર કરાયેલા નિવેદનમાં સોનિયા ગાંધીએ સ્વીકાર્યું છે કે વર્ષો સુધી જે ગોપનીયતાનું તેમણે કડક રક્ષણ કર્યું હતું, તેને વાચકો સામે ખુલ્લી મૂકવી તેમના માટે જરાય સરળ નહોતી. 10 નવેમ્બરના રોજ પ્રકાશિત થનારી આ 544 પાનાની આત્મકથામાં તેમણે સ્પષ્ટ કર્યું છે કે સત્તા કે હોદ્દાની લાલસા નહીં, પરંતુ અંગત સ્વજનોને ગુમાવવાનું ઊંડું દુઃખ અને વેદના જ તેમને રાજકારણની ધગધગતી દુનિયામાં ખેંચી લાવ્યા હતા.

આ પુસ્તક માત્ર એક રાજકીય દસ્તાવેજ નથી, પરંતુ ઇટાલીના એક નાનકડા ગામડામાં વીતેલા સાદા બાળપણથી શરૂ કરીને ભારતના સૌથી શક્તિશાળી રાજકીય પરિવારની વહુ બનવા સુધીની એક લાગણીસભર યાત્રા છે. 1965માં કેમ્બ્રિજ ખાતે 19 વર્ષની ઉંમરે રાજીવ ગાંધી સાથે થયેલી પહેલી મુલાકાત અને પહેલી જ નજરે થયેલા પ્રેમે તેમના જીવનનો માર્ગ સદંતર બદલી નાખ્યો હતો. સાસુ ઇન્દિરા ગાંધી સાથેનો પ્રથમ પરિચય, ભારતીય સંસ્કૃતિ, હિન્દી ભાષા, સાડી પહેરવાની કળા અને ભારતીય ભોજન અપનાવવાની તેમની મથામણને પણ પુસ્તકમાં ખૂબ જ આત્મીયતાથી વણી લેવામાં આવી છે.

પરંતુ, આ સુંદર દંપતીજીવન અને પરિવાર પર વિયોગ અને દુર્ઘટનાઓનો પહાડ તૂટી પડ્યો હતો. સંજય ગાંધીનું વિમાન દુર્ઘટનામાં અવસાન, 1984માં ઇન્દિરા ગાંધીની ઘાતકી હત્યા અને ત્યારબાદ 1991માં ચૂંટણી પ્રચાર દરમિયાન રાજીવ ગાંધીની બોમ્બ વિસ્ફોટમાં કરાયેલી હત્યાએ સોનિયા ગાંધીના જીવનને સંપૂર્ણપણે ઝંઝોડી મૂક્યું હતું. સતત દબાણ છતાં વર્ષો સુધી સક્રિય રાજકારણથી દૂર રહેલા સોનિયા ગાંધીએ આખરે કોંગ્રેસને સંકટમાંથી ઉગારવા રાજકારણમાં પ્રવેશ કરવો પડ્યો હતો. 2004ની ચૂંટણીમાં જીત મેળવ્યા બાદ વડા પ્રધાન પદ સ્વીકારવાનો ઇનકાર કરવાનો તેમનો નિર્ણય ઇતિહાસના પાના પર સુવર્ણ અક્ષરે અંકાયેલો છે. એક લાખ નકલોના પ્રથમ પ્રિન્ટિંગ સાથે આવનારું આ પુસ્તક ગાંધી પરિવારની "માનવીય સંવેદનાઓ" અને છેલ્લા છ દાયકામાં ભારતમાં આવેલા સામાજિક-રાજકીય પરિવર્તનોને એક તદ્દન અલગ જ નજરિયાથી રજૂ કરશે.