શામલી : ઉત્તર પ્રદેશના શામલી જિલ્લામાંથી સરકારી તંત્ર અને પોલીસની હાજરી વચ્ચે એક અત્યંત સનસનાટીભરી અને હૃદયકંપાવનારી ઘટના સામે આવી છે. જિલ્લા મુખ્યાલયથી લગભગ ૭ કિલોમીટર દૂર આવેલા ગોહરની ગામમાં લાંબા સમયથી ચાલી રહેલા જમીન વિવાદ વચ્ચે જ્યારે સરકારી અધિકારીઓ બુલડોઝર લઈને સીમા દિવાલ તોડવા પહોંચ્યા, ત્યારે આદિત્ય નામના એક યુવકે તહસીલદાર અને અસંખ્ય પોલીસ કર્મચારીઓની નજર સામે જ પોતાના પર પેટ્રોલ છાંટીને આગ ચાંપી દીધી હતી. આ સમગ્ર ઘટનાનો વીડિયો સોશિયલ મીડિયા પર વાયરલ થતાં ખળભળાટ મચી ગયો છે.

સ્થાનિક પરિવારના જણાવ્યા અનુસાર, મહેસૂલ ટીમ અને પોલીસે તેમની રજૂઆતો સાંભળવાનો અને કાર્યવાહી સ્થગિત કરવાનો સ્પષ્ટ ઈનકાર કરી દીધો હતો. આનાથી આવેશમાં આવીને આદિત્ય ઘરમાંથી પેટ્રોલની બોટલ લાવ્યો હતો અને પોતાના પર છાંટીને વિરોધ દર્શાવતા આગ લગાવી દીધી હતી. શરીર પર લપેટાયેલી આગની જ્વાળાઓ સાથે બૂમો પાડતો યુવક નજીકના પાણીથી ભરેલા ખેતરમાં કૂદી પડ્યો હતો. સ્થળ પર હાજર પરિવારજનો અને પોલીસકર્મીઓએ તાત્કાલિક તેને બહાર કાઢીને ગંભીર હાલતમાં હોસ્પિટલ પહોંચાડ્યો હતો.

૬૦ થી ૭૦ ટકા દાઝી ગયેલા યુવકને દિલ્હી રિફર કરાયો

પ્રાથમિક સારવાર આપનારા ડોક્ટરોના જણાવ્યા મુજબ, આદિત્યનું શરીર લગભગ ૬૦ થી ૭૦ ટકા જેટલું ગંભીર રીતે દાઝી ગયું છે. તેની નાજુક સ્થિતિને ધ્યાનમાં રાખીને વધુ અદ્યતન સારવાર માટે તેને દિલ્હીની સફદરજંગ હોસ્પિટલમાં રિફર કરવામાં આવ્યો છે, જ્યાં તેની હાલત ચિંતાજનક હોવાનું કહેવાય છે.

મહેસૂલ અધિકારી પર ૧૦ લાખની લાંચનો ગંભીર આરોપ

આ કરુણ ઘટના બાદ પીડિત પરિવારે પ્રશાસન પર સંગીન આરોપો લગાવ્યા છે. પરિવારનો દાવો છે કે મહેસૂલ અધિકારી અમરીશ શર્માએ બુલડોઝર કાર્યવાહી અટકાવવાના બદલામાં ૧૦ લાખ રૂપિયાની લાંચ માંગી હતી અને પૈસા ન આપવા બદલ સીમા દિવાલ તોડી પાડવાની ધમકી આપી હતી. વધુમાં, સરકારી ટીમે કાર્યવાહી કરતા પહેલાં તેમને કોઈ કાયદેસર નોટિસ પણ આપી નહોતી. આ સમગ્ર વિવાદ ૭૦ વર્ષીય ખેડૂત મનોજ બેનીવાલની ૧૬ વીઘા જમીનનો છે, જે ૨૦૧૦ થી તેમના ભાભી સાથે કાનૂની ગૂંચવણમાં ફસાયેલી છે.

બીજી તરફ, શામલીના એસડીએમ સચિન રાજપૂતે લાંચ માંગવાના આરોપો અંગે અજ્ઞાનતા દર્શાવતા કહ્યું છે કે આત્મદાહની સમગ્ર ઘટના અને લાંચના આરોપો અંગે તટસ્થ તપાસ હાથ ધરવામાં આવશે.