મુંબઈ:  માયાનગરી મુંબઈમાં સ્વાદિષ્ટ વાનગીઓના શોખીનો માટે ચોંકાવનારા સમાચાર સામે આવ્યા છે. મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) એ મલાડ (પશ્ચિમ) સ્થિત પ્રખ્યાત 'હોટેલ રાધા' પર અચાનક દરોડો પાડીને તેની ભયાનક અસ્વચ્છતાનો પર્દાફાશ કર્યો છે. તપાસ દરમિયાન રસોડામાં જીવંત ઉંદરો અને વંદાઓનો ભારે ઉપદ્રવ જોવા મળ્યો હતો. પરિસ્થિતિ એટલી ગંભીર હતી કે અધિકારીઓએ FSS એક્ટ, ૨૦૦૬ ની કલમ ૩૨(૩) હેઠળ પગલાં લઈને હોટેલનું ફૂડ બિઝનેસ લાઇસન્સ તાત્કાલિક અસરથી સસ્પેન્ડ કરી દીધું છે.

તપાસ ટીમે જ્યારે રસોડામાં પ્રવેશ કર્યો ત્યારે છત પરથી ઉંદરો કૂદતા અને ખુલ્લી ડ્રેનેજ લાઇનમાંથી બહાર નીકળતા નજરે પડ્યા હતા. વંદાઓ સીધા રસોઈના વાસણો પર ફરી રહ્યા હતા, જ્યારે ગટરનું પાણી ભરાવા અને તેલ-ગ્રીસ જમા થવાને કારણે આખા રસોડામાં અસહ્ય દુર્ગંધ ફેલાયેલી હતી. આશ્ચર્યજનક રીતે, કચરાથી ભરેલી ખુલ્લી ડસ્ટબીનની બરાબર ઉપર જ ટોસ્ટર મૂકીને ગ્રાહકો માટે ખોરાક તૈયાર કરવામાં આવી રહ્યો હતો. કાટ લાગેલા વાસણો અને ધૂળથી ભરેલા કન્ટેનરમાં ખાદ્યપદાર્થોનો સંગ્રહ કરવામાં આવતો હતો.

FDA એ દરોડા દરમિયાનના તમામ ફોટોગ્રાફ્સ અને વિડીયો પુરાવા તરીકે એકત્રિત કર્યા છે અને ૧૮ ઓગસ્ટથી જ હોટેલમાં તમામ પ્રકારનું ઉત્પાદન, સંગ્રહ અને વેચાણ સંપૂર્ણપણે બંધ કરવાનો આદેશ આપ્યો છે. સમગ્ર મહારાષ્ટ્રમાં હાલમાં રેસ્ટોરન્ટ્સ, હોટેલો અને સરકારી કેન્ટીનો પર રાજ્યવ્યાપી કડક ચેકિંગ ઝુંબેશ ચાલી રહી છે, જેના ભાગરૂપે આ મોટી કાર્યવાહી કરવામાં આવી છે. લોકોના સ્વાસ્થ્ય સાથે ચેડાં કરતી આવી સંસ્થાઓ સામે આગામી દિવસોમાં વધુ કડક પગલાં લેવામાં આવશે તેવી ચેતવણી પણ આપવામાં આવી છે.