મુખ્યમંત્રી પટેલ વોશિંગ્ટન ડીસીથી સામાન્ય મુસાફરની જેમ ટ્રેનમાં ન્યૂયોર્ક પહોંચ્યા
વોશિંગ્ટનમાં સફળ સત્તાવાર બેઠકો બાદ ન્યૂયોર્કમાં તેઓ ગ્લોબલ ઇન્વેસ્ટર્સ, ઉદ્યોગ સાહસિકો અને વિશાળ એનઆરજી સમુદાય સાથે બેઠક યોજી રાજ્યમાં વિદેશી રોકાણને વેગ આપશે
ન્યૂયોર્ક તા.૨૦: ગુજરાતના મુખ્યમંત્રી ભૂપેન્દ્રભાઈ પટેલ પોતાના ઉચ્ચ સ્તરીય પ્રતિનિધિમંડળ સાથે અમેરિકાના સત્તાવાર પ્રવાસે છે. તેઓ વોશિગ્ટન ડીસી ખાતેની મહત્વપૂર્ણ બેઠકો પૂર્ણ કરીને ટ્રેન મારફતે ન્યૂયોર્ક પહોંચ્યા છે, જ્યાં તેઓ વૈશ્વિક ઉદ્યોગપતિઓ અને અમેરિકા સ્થિત ભારતીય-ગુજરાતી સમુદાય સાથે બેઠકો કરશે.
રાજ્યમાં વૈશ્વિક રોકાણ, સેમિકન્ડક્ટર, રિન્યુએબલ એનર્જી, ગ્રીન હાઇડ્રોજન અને આધુનિક ઈન્ફ્રાસ્ટ્રક્ચર ક્ષેત્રે વિદેશી સહયોગ વધારવાના ઉદ્દેશ્યથી ગુજરાતના મુખ્યમંત્રી ભૂપેન્દ્રભાઈ પટેલ હાલ યુનાઈટેડ સ્ટેટ્સ ઑફ અમેરિકા (USA) ના પ્રવાસે છે. વોશિગ્ટન ડીસી ખાતેના કાર્યક્રમો સંપન્ન કર્યા બાદ મુખ્યમંત્રી અને તેમના વરિષ્ઠ અધિકારીઓના ડેલિગેશને ન્યૂયોર્ક જવા માટે ટ્રેન મુસાફરી પસંદ કરી હતી. અત્યંત સહજ અને સામાન્ય મુસાફરોની જેમ ટ્રેનમાં મુસાફરી કરીને તેઓ ન્યૂયોર્ક પહોંચ્યા તે બાબત ભારતીય સમુદાયમાં પણ આકર્ષણનું કેન્દ્ર બની છે. વોશિગ્ટન ડીસી ખાતેના રોકાણ દરમિયાન મુખ્યમંત્રીશ્રીએ વિવિધ ક્ષેત્રના અગ્રણીઓ સાથે વ્યાપક ચર્ચા-વિચારણા હાથ ધરી હતી.
વૈશ્વિક નીતિ નિર્ધારકો સાથે ચર્ચાઃ યુએસ-ઈન્ડિયા બિઝનેસ કાઉન્સિલ અને અમેરિકન ચેમ્બર ઓફ કોમર્સના પ્રતિનિધિઓ સાથે દ્વિપક્ષીય વેપાર સંબંધો મજબૂત કરવા સંવાદ સાધ્યો.
સેમિકન્ડક્ટર અને ઇનોવેશનઃ સાણંદ અને ધોલેરા સ્પેશિયલ ઇન્વેસ્ટમેન્ટ રિજન (SIR) માં વૈશ્વિક કંપનીઓના આગમન સંદર્ભે યુએસ ટેકનોલોજી કંપનીઓને ગુજરાતમાં રોકાણ કરવા આમંત્રણ આપ્યું.
ગિફટ સિટીનું વૈશ્વિક પ્રમોશનઃ ગાંધીનગર સ્થિત GIFT City માં આંતરરાષ્ટ્રીય ફાઇનાન્સ અને ફિનટેક ક્ષેત્રે કામ કરતી વૈશ્વિક પેઢીઓને વિસ્તરણ કરવા અનુરોધ કર્યો.
ન્યૂયોર્ક આગમન બાદ મુખ્યમંત્રીના પ્રવાસનો આગામી તબક્કો અત્યંત વ્યસ્ત અને નીતિગત રીતે મહત્વપૂર્ણ રહેવાનો છે. ન્યૂયોર્કમાં અગ્રણી વૈશ્વિક ફાઇનાન્સિયલ સંસ્થાઓ, અગ્રણી વેન્ચર કેપિટાલિસ્ટ્સ અને કંપનીઓના સીઈઓ (CEOs) સાથે વન-ટુ-વન બેઠકોનું આયોજન કરવામાં આવ્યું છે. આ ઉપરાંત, ન્યૂયોર્ક અને ન્યૂજર્સી વિસ્તારમાં વસતા વિશાળ નોન-રેસિડેન્ટ ગુજરાતી (NRG) સમુદાય સાથે સ્નેહમિલન યોજાશે, જેમાં ગુજરાતના વિકાસમાં પ્રવાસી ભારતીયોના યોગદાન અને ભાવિ યોજનાઓ પર વિચારવિમર્શ કરાશે.
ગુજરાત જે રીતે દેશનું ગ્રોથ એન્જિન બન્યું છે, તે સ્થિતિમાં વૈશ્વિક સ્તરે અમેરિકા જેવા અગ્રણી ઔદ્યોગિક દેશ સાથે સીધો સમન્વય રાજ્યના ઔદ્યોગિક નકશાને નવી ઊંચાઈ આપશે. ટ્રેન મારફતે સરળતાપૂર્વક ન્યૂયોર્ક પહોંચીને મુખ્યમંત્રીએ સમય વ્યવસ્થાપન અને જનસંપર્ક બંને મોરચે સકારાત્મક સંદેશ આપ્યો છે.
(10:59 AM IST)
છેલ્લા 8 દિવસમાં સૌથી લોકપ્રિય 
