મુરાદાબાદ, તા. ૨૦: ઉત્તર પ્રદેશના મુરાદાબાદ જિલ્લાના ભોજપુર વિસ્તારમાંથી એક અનોખી અને દિલચસ્પ પ્રેમકથા સામે આવી છે. કહેવાય છે કે પ્રેમ કોઈપણ બંધનો, ઉંમર કે પરિસ્થિતિઓથી પર હોય છે. ભોજપુરના રાની નાગલ ગામમાં ત્રણ બાળકોની વિધવા માતાએ છ બાળકોના પિતા સાથે લગ્ન કરીને નવી જિંદગીની શરૂઆત કરી છે. શરૂઆતમાં બંનેએ છૂપી રીતે લગ્ન કર્યા હતા, પરંતુ બાદમાં ગ્રામ પંચાયતે પણ આ અસામાન્ય સંબંધને સંપૂર્ણ સામાજિક મંજૂરી આપી દીધી છે.

અકસ્માતમાં પતિનું મોત અને પ્રેમનો ઉદય
સ્થાનિક લોકોના જણાવ્યા અનુસાર, રાની નાગલ ગામની રહેવાસી તબસ્સુમના પતિ રિયાઝ-ઉલનું લગભગ પાંચ વર્ષ પહેલાં એક માર્ગ અકસ્માતમાં કરૂણ મોત થયું હતું. પતિના અવસાન બાદ તબસ્સુમ તેના ત્રણ નાના બાળકો સાથે સાસરીમાં જ રહેતી હતી અને બાળકોનો ઉછેર કરતી હતી. આ દરમિયાન લગભગ ત્રણ વર્ષ પહેલાં તેની મુલાકાત સિરસવાન દૌરાહા વિસ્તારના કોરબંકુ ગામના રહેવાસી અને વાહન મિકેનિક મોહમ્મદ ઉમર સાથે થઈ હતી. ઉમર પોતે પણ છ બાળકોનો પિતા હતો. બંને વચ્ચે અવારનવાર થતી વાતચીત ધીમે ધીમે ગાઢ પ્રેમ સંબંધમાં પરિણમી હતી.

કાલીયાર શરીફમાં ગુપ્ત નિકાહ અને કોર્ટ મેરેજ
ઘણા વર્ષો સુધી પ્રેમ સંબંધમાં રહ્યા બાદ, બંનેએ સાથે જીવવા-મરવાનો નિર્ણય લીધો. તેમણે પરિવારજનોને જાણ કર્યા વિના જ હરિદ્વાર નજીક આવેલી પ્રસિદ્ધ કાલીયાર શરીફ દરગાહ પર જઈને ગુપ્ત રીતે નિકાહ કરી લીધા હતા. આટલેથી જ ન અટકતા, પોતાના સંબંધને કાનૂની સુરક્ષા આપવા માટે તેમણે કોર્ટ મેરેજની તમામ કાનૂની પ્રક્રિયાઓ પણ પૂર્ણ કરી લીધી હતી.

ગ્રામ પંચાયતે લગ્નને આપી સામાજિક સ્વીકૃતિ
જ્યારે આ અનોખા લગ્નની જાણ તબસ્સુમના સાસરિયાં અને ગામના લોકોને થઈ, ત્યારે ગામમાં ચર્ચાઓનો દોર શરૂ થયો. પરિસ્થિતિને થાળે પાડવા માટે ગામમાં એક પંચાયત બોલાવવામાં આવી હતી. પંચાયત સમક્ષ તબસ્સુમ અને ઉમરે એકબીજા સાથે રહેવાની મક્કમ ઈચ્છા વ્યક્ત કરી હતી.

તબસ્સુમના સાળા અને સાસરિયાઓએ ઉદારતા દાખવતા પંચાયતને જણાવ્યું કે, તેમણે આટલા વર્ષો સુધી તબસ્સુમ અને તેના બાળકોને ખુશીથી રાખ્યા છે, પરંતુ જો તે પોતાની મરજીથી નવું જીવન શરૂ કરવા માંગતી હોય તો તેમને કોઈ વાંધો નથી. તેમણે સ્પષ્ટ કર્યું કે ભવિષ્યમાં તેમનો તબસ્સુમ પ્રત્યે કોઈ અધિકાર કે જવાબદારી રહેશે નહીં. સાસરિયાંના હકારાત્મક વલણ બાદ પંચાયતે પણ બંનેના લગ્નને સામાજિક મંજૂરી આપી અને તબસ્સુમને તેના બાળકો અને ઘરવખરીના સામાન સાથે પ્રેમાળ વાતાવરણમાં ઉમર સાથે વિદાય આપવામાં આવી. હાલ આ પ્રેમકથા સમગ્ર વિસ્તારમાં ભારે ચર્ચાનો વિષય બની છે.