નવી દિલ્હી : રેડ સી અને હિંદ મહાસાગરને જોડતા અત્યંત મહત્વપૂર્ણ દરિયાઈ માર્ગો પર ચાંચિયાગીરીનો ખતરો ફરી એકવાર ઘેરો બન્યો છે. સોમાલિયા અને યમનના દરિયાકાંઠેથી અલગ-અલગ ઘટનાઓમાં કુલ ૨૨ ભારતીય નાગરિકોને લઈને જઈ રહેલા બે મોટા વાણિજ્યિક જહાજોનું સશસ્ત્ર ચાંચિયાઓ દ્વારા અપહરણ કરવામાં આવ્યું છે. આ સનસનાટીભર્યા બનાવ બાદ સમગ્ર આંતરરાષ્ટ્રીય શિપિંગ ક્ષેત્ર અને દરિયાઈ સુરક્ષા એજન્સીઓમાં ભારે ખળભળાટ મચી ગયો છે. કેન્દ્રીય શિપિંગ મંત્રાલયના વરિષ્ઠ અધિકારીઓએ ઘટનાની પુષ્ટિ કરતા જણાવ્યું છે કે હાલ તમામ ભારતીય ક્રૂ સભ્યો હેમખેમ અને સુરક્ષિત છે.

સોમાલિયામાં લશ્કરી સામગ્રી લઈ જતું જહાજ 'M/V LUTUF' કબ્જે

પ્રથમ ઘટના ૧૭ ઓગસ્ટના રોજ બની હતી, જ્યાં કેમરૂનનો ધ્વજ ધરાવતા 'M/V LUTUF' નામના કાર્ગો જહાજને સોમાલિયાના પન્ટલેન્ડ કિનારેથી ૮ સશસ્ત્ર ચાંચિયાઓએ બે બોટ (સ્કિફ) ની મદદથી આંતરીને પોતાના કબજામાં લઈ લીધું હતું. આ જહાજ તુર્કી લશ્કરી તાલીમ કેન્દ્ર માટે શસ્ત્રો, સેટેલાઇટ ગિયર અને સંચાર સાધનો લઈ જઈ રહ્યું હતું. આ જહાજ પર કુલ ૧૦ ક્રૂ સભ્યો સવાર છે, જેમાં ૬ ભારતીય નાગરિકોનો સમાવેશ થાય છે. ઘટના બાદ તુર્કીના હેલિકોપ્ટરો અને ડ્રોન દ્વારા આ વિસ્તારમાં એરિટ્રેક મોનિટરિંગ કરવામાં આવી રહ્યું છે.

એડનના અખાતમાં તેલ ટેન્કર 'MT સિબુ ૧' નું અપહરણ

બીજી ઘટના ૨૦ ઓગસ્ટના રોજ એડનના અખાતમાં યમનના કિનારાથી ૩૦ નોટિકલ માઈલ દૂર ઘટી હતી. એરિટ્રિયાના ધ્વજવાળા તેલ ઉત્પાદક ટેન્કર 'MT સિબુ ૧' નો ૬ સશસ્ત્ર ચાંચિયાઓએ કબ્જો મેળવી લીધો હતો. આ ટેન્કરમાં ૧૬ ભારતીય નાગરિકો સહિત કુલ ૨૦ ક્રૂ સભ્યો સવાર છે. વિદેશી જહાજો અને નાગરિકોના સુરક્ષિત છુટકારા માટે ભારતીય નૌકાદળ અને સંબંધિત આંતરરાષ્ટ્રીય દરિયાઈ એજન્સીઓ સતત સંપર્કમાં રહીને આખી પરિસ્થિતિ પર બારીકાઈથી નજર રાખી રહી છે.

હોર્ન ઓફ આફ્રિકામાં વધતી અસ્થિરતા

સુએઝ નહેર અને લાલ સમુદ્રને જોડતો એડનનો અખાત વૈશ્વિક વેપાર માટેની લાઈફલાઈન સમાન છે. છેલ્લા કેટલાક સમયથી સોમાલી ચાંચિયાઓ દ્વારા આ માર્ગ પર હુમલાઓમાં ચિંતાજનક વધારો થયો છે. ભારત સરકાર આંતરરાષ્ટ્રીય સુરક્ષા મિકેનિઝમ દ્વારા પોતાના નાગરિકોની સુરક્ષિત વાપસી માટે તમામ જરૂરી કાનૂની અને કૂટનીતિક પગલાં ભરી રહી છે.