ઇસ્લામાબાદ:પાકિસ્તાનના રાજકીય અને સૈન્ય મુખ્ય મથક ગણાતા રાવલપિંડી શહેરમાં ગંભીર સુરક્ષા કટોકટી સર્જાવાની આશંકા વચ્ચે પાકિસ્તાન સરકારે એક અત્યંત મહત્વપૂર્ણ નિર્ણય લઈને સેનાની ત્રણ ટુકડીઓ (કંપનીઓ) ને મોરચે તૈનાત કરી દીધી છે. દેશમાં વધી રહેલી આંતરિક અસ્થિરતા, હિંસક બનાવો અને અણધારી સુરક્ષા કારવાઈઓને ધ્યાનમાં રાખીને કેન્દ્રીય ગૃહ અને નાર્કોટિક્સ કંટ્રોલ મંત્રાલય દ્વારા આ અંગેનું નોટિફિકેશન બહાર પાડવામાં આવ્યું છે. આ આદેશ હેઠળ આગામી છ મહિના માટે લશ્કરી ટુકડીઓ રાવલપિંડીમાં સ્થાનિક પ્રશાસનને સુરક્ષા કાર્યોમાં સંપૂર્ણ સહયોગ આપશે.

​સરકાર દ્વારા જારી કરવામાં આવેલા સત્તાવાર પરિપત્ર અનુસાર, બંધારણની કલમ ૨૪૫ હેઠળ લશ્કરને નાગરિક સત્તાની મદદ માટે બોલાવવાની વિશેષ સત્તાનો ઉપયોગ કરવામાં આવ્યો છે. પંજાબ પ્રાંતના ગૃહ વિભાગ દ્વારા જુલાઈ માસમાં મોકલવામાં આવેલા પત્ર અને ગૃહ મંત્રાલયની તાજેતરની ભલામણોને આધારે આ આદેશ તુરંત અસરથી અમલી બનાવવામાં આવ્યો છે. રાવલપિંડી જિલ્લા પ્રશાસનને કોઈપણ અનિચ્છનીય ઘટના કે સંભવિત અશાંતિ સામે ત્વરિત અને સક્ષમ પગલાં લેવામાં મદદરૂપ થવાના હેતુથી સેનાને તૈનાત કરવાનો નિર્ણય લેવાયો છે.

​તાજેતરમાં જ રાવલપિંડીમાં સુરક્ષા દળો પર થયેલા ગોળીબારના એક હિંસક બનાવ બાદ સ્થિતિ વધુ તંગ બની હતી. જેમાં ભૂતપૂર્વ વડાપ્રધાન ઇમરાન ખાનની પાર્ટી પાકિસ્તાન તેહરીક-એ-ઇન્સાન (PTI) સાથે જોડાયેલા એક શંકાસ્પદ વ્યક્તિએ સેના પર ફાયરિંગ કર્યું હતું અને વળતા પ્રહારમાં તે માર્યો ગયો હતો. જોકે, ઇમરાન ખાનની પાર્ટીએ આ આરોપોને ફગાવી દઈને સરકાર પર રાજકીય ષડયંત્ર રચવાનો આરોપ લગાવ્યો છે. આ વિવાદ બાદથી શહેરમાં આંતરિક સંઘર્ષ વકરવાની ભીતિ સેવાઈ રહી હતી.

​ઉલ્લેખનીય છે કે, રાવલપિંડી એ પાકિસ્તાન આર્મીનું જનરલ હેડક્વાર્ટર (GHQ) ધરાવતું અત્યંત સંવેદનશીલ અને વ્યૂહરચનાત્મક શહેર છે. ગૃહ મંત્રાલયે જારી કરેલા આદેશોની નકલ તમામ ઉચ્ચ સૈન્ય અધિકારીઓ, ફ્રેડરલ સુરક્ષા એજન્સીઓ અને પ્રાંતીય અધિકારીઓને મોકલી દેવામાં આવી છે. આર્મી યુનિટ્સ આગામી અડધા વર્ષ સુધી શહેરમાં કાયદો અને વ્યવસ્થાની સ્થિતિ જાળવવા માટે સંવેદનશીલ સ્થળોએ તૈનાત રહેશે.