​લંડન:બ્રિટનના પ્રિન્સ હેરી અને સંગીતકાર એલ્ટન જોન સહિત સાત જેટલી અગ્રણી વૈશ્વિક હસ્તીઓને લંડનની હાઇકોર્ટ તરફથી મોટો કાનૂની ફટકો પડ્યો છે. 'ડેઇલી મેઇલ' અખબારના પબ્લિશર એસોસિએટેડ ન્યૂઝપેપર્સ લિમિટેડ (ANL) સામે ગોપનીયતાના ભંગ, ફોન હેકિંગ અને ગેરકાયદેસર રીતે અંગત માહિતી મેળવવા અંગે કરવામાં આવેલો કેસ નિષ્ફળ ગયા બાદ, કોર્ટે તમામ અરજદારોને પ્રારંભિક કાનૂની ખર્ચ પેટે ૯.૫ મિલિયન પાઉન્ડ (આશરે ૧.૩ કરોડ ડૉલર એટલે કે અંદાજે ૧૧૦ કરોડ રૂપિયા) ચૂકવવાનો આદેશ આપ્યો છે. જજ મેથ્યુ નિક્લિને એક લેખિત ચુકાદામાં સ્પષ્ટ કર્યું છે કે આ રકમ આગામી ૨૮ ઓગસ્ટ સુધીમાં ચૂકવી દેવાની રહેશે.

​આ હાઇ પ્રોફાઇલ કાનૂની લડાઇ બ્રિટિશ ટેબ્લોઇડ અખબારો દ્વારા સમાચાર એકત્રિત કરવાની પદ્ધતિઓ સામેની હતી. અરજદારોએ એસોસિએટેડ ન્યૂઝપેપર્સ પર ગંભીર આક્ષેપો કર્યા હતા, જેમાં ફોન ટેપિંગ, વાહનોમાં કે ઘરમાં ચોરીછૂપીથી વોઇસ રેકોર્ડર મૂકવા, ખાનગી જાસૂસો રોકવા અને તબીબી કે નાણાકીય દસ્તાવેજો ગેરકાયદેસર રીતે મેળવવાનો સમાવેશ થતો હતો. જોકે, આશરે ૧૧ સપ્તાહ સુધી ચાલેલી લાંબી કાનૂની કાર્યવાહી બાદ કોર્ટે તમામ ૯૭ દાવાઓ ફગાવી દીધા હતા. કોર્ટે પોતાના નિર્ણયમાં નોંધ્યું હતું કે અરજદારો પબ્લિશર સામે કોઈ નક્કર પુરાવા રજૂ કરવામાં સંપૂર્ણપણે નિષ્ફળ રહ્યા છે અને જે પણ અહેવાલો પ્રગટ થયા હતા તે કાયદેસરના સ્ત્રોતોમાંથી આવ્યા હોવાની પૂરેપૂરી શક્યતા છે.

​આ કેસમાં માત્ર પ્રિન્સ હેરી જ નહીં, પરંતુ બ્રિટનની અન્ય જાણીતી હસ્તીઓ પણ સામેલ હતી. પ્રખ્યાત ગાયક એલ્ટન જોન ઉપરાંત તેમના ફિલ્મ પ્રોડ્યુસર પતિ ડેવિડ ફર્નિશ, જાણીતી અભિનેત્રીઓ એક્ટ્રેસ સાડી ફ્રોસ્ટ અને લિઝ હર્લી, રંગભેદ વિરોધી પ્રવૃત્તિઓ માટે જાણીતા કાર્યકર ડોરીન લોરેન્સ તેમજ રાજકારણી સાયમન હ્યુજીસે પણ આ દાવો દાખલ કર્યો હતો.

​સુનાવણી દરમિયાન ચુકાદો આપતા જજ નિક્લિને અરજદારોના વલણ સામે આકરા પ્રહારો કર્યા હતા. તેમણે જણાવ્યું હતું કે આ કેસમાં કરાયેલા દાવાઓ કોઈ પણ નક્કર આધાર વગરના અને માત્ર અટકળો પર આધારિત હતા. જ્યારે તે સ્પષ્ટ થઈ ગયું હતું કે દાવાઓને સમર્થન આપતા પુરાવા નથી, ત્યારે પણ અરજદારોએ તેને સ્વેચ્છાએ પાછા ખેંચ્યા ન હતા, જે વર્તન અત્યંત અયોગ્ય અને અવાસ્તવિક હતું. કોર્ટના આ નિર્દેશથી ડેઇલી મેઇલના પત્રકારો અને સંપાદકોના પક્ષની જીત થઈ છે.

​એસોસિએટેડ ન્યૂઝપેપર્સ વતી રજૂઆત કરવામાં આવી હતી કે આ લાંબી અને જટિલ કાનૂની લડાઈ દરમિયાન તેમને ૩૪ મિલિયન પાઉન્ડથી વધુનો ખર્ચ થયો છે. અત્યારે કોર્ટે પ્રારંભિક રકમ તરીકે ૯.૫ મિલિયન પાઉન્ડ જમા કરાવવા આદેશ આપ્યો છે, પરંતુ જો પબ્લિશર બાકીની રકમ વસૂલવા માટે કાનૂની કાર્યવાહી આગળ ધપાવશે, તો પ્રિન્સ હેરી અને તેમની સાથેના અરજદારો પર વધારાના ૨૫ મિલિયન પાઉન્ડ ચૂકવવાનું જોખમ તોળાઈ રહ્યું છે. જોકે, અરજદારોએ શરૂઆતમાં જ વિમા પોલિસી લીધી હોવાથી તેનો અડધો ભાગ વિમા કંપની તરફથી કવર થવાની શક્યતા દર્શાવાઈ છે.

​સુપ્રીમ કોર્ટનો આ આદેશ એવા સમયે આવ્યો છે જ્યારે પ્રિન્સ હેરી અને તેમના પત્ની મેઘન માર્કલ બ્રિટન પાછા ફરવાની તૈયારી કરી રહ્યા છે. રોયલ પરિવારના વરિષ્ઠ સભ્યો તરીકેની જવાબદારીઓ છોડ્યા બાદ આ દંપતી છેલ્લા કેટલાક વર્ષોથી કાલિફોર્નિયામાં સ્થાયી થયું હતું. પરંતુ તાજેતરમાં જ તેઓ લંડનની બહાર એક ખાનગી નિવાસસ્થાને રહેવા માટે પરત ફરી રહ્યા છે. મીડિયા પબ્લિશર્સ સામે પ્રિન્સ હેરી દ્વારા કરવામાં આવેલા ત્રણ મુખ્ય કેસો પૈકી આ છેલ્લો કેસ હતો.

​અગાઉ, પ્રિન્સ હેરીએ ડેઇલી મિરરના પબ્લિશર્સ સામેનો કેસ જીત્યો હતો જેમાં કોર્ટે વ્યાપક ફોન હેકિંગની વાત સ્વીકારી હતી. તે જ રીતે, રુપર્ટ મર્ડોકની અખબાર કંપની 'ધ સન'એ પણ હેરીની અંગત જિંદગીમાં ખલેલ પહોંચાડવા બદલ માફી માંગીને ભારે વળતર ચૂકવ્યું હતું. પરંતુ ડેઇલી મેઇલ સામેના પરાજયથી તેમના આઈન-કાનૂની અભિયાનને મોટો સેટબેક લાગ્યો છે. પોતાના જ પરિવાર અને મીડિયા સામે કાનૂની લડાઈ લડવાના કારણે તેમના પિતા કિંગ ચાર્લ્સ અને ભાઈ પ્રિન્સ વિલિયમ સાથેના સંબંધોમાં પણ ભારે તિરાડ પડી હતી.

​આ સમગ્ર મામલે એસોસિએટેડ ન્યૂઝપેપર્સે સંતોષ વ્યક્ત કરતા જણાવ્યું હતું કે કોર્ટનો આ નિર્ણય અખબાર અને તેના પત્રકારોની છબી ખરાબ કરવાના એક નિષ્ફળ પ્રયાસ પર ચુકાદો આપે છે. જે દાવાઓમાં કોઈ તથ્ય નહોતું તેને આટલા લાંબા સમય સુધી ખેંચવામાં આવ્યા તે બાબત કાનૂની વ્યવસ્થા પર પણ સવાલો ઉભા કરે છે. આ ચુકાદા બાદ હવે ૨૮ ઓગસ્ટ સુધીમાં ૧.૩ કરોડ ડૉલરની ચૂકવણી કરવા માટે અરજદારોના વકીલો પ્રક્રિયા હાથ ધરી રહ્યા છે.