નવી દિલ્હી:  NITI આયોગના તાજેતરના રિપોર્ટમાં ભારતના યુવાધન અંગે ચોંકાવનારા આંકડા સામે આવ્યા છે. દેશના ૧૫ થી ૨૯ વર્ષની વયના આશરે ૮.૭ કરોડ (૮૭ મિલિયન) યુવાનો શિક્ષણ, રોજગાર કે કોઈ પણ પ્રકારની તાલીમ વિના (NEET) સમય પસાર કરી રહ્યા છે. આ રિપોર્ટમાં સૌથી મોટો ખુલાસો એ થયો છે કે આ ૮.૭ કરોડ યુવાનોમાંથી લગભગ ૮૮% યુવાનો ઘરેલુ જવાબદારીઓ અને કામકાજમાં રોકાયેલા છે, જેમાં મહિલાઓની સંખ્યા અને તેમની સામે આવતા આર્થિક તથા સામાજિક પડકારો સૌથી વધુ છે.

રિપોર્ટમાં શિક્ષણ અને ઉદ્યોગ વચ્ચેની વધતી ખાઈને ઉજાગર કરવામાં આવી છે, જે દર્શાવે છે કે માત્ર ઉચ્ચ ડિગ્રી મેળવી લેવાથી નોકરીની ગેરંટી મળતી નથી. દેશના માત્ર ૮.૨૫% સ્નાતકો જ પોતાની લાયકાત અને અભ્યાસને અનુરૂપ નોકરીઓ મેળવવામાં સફળ રહ્યા છે. સ્નાતક થયેલા યુવાનોમાં બેરોજગારીનો દર લગભગ ૧૩% પર પહોંચી ગયો છે. આ આંકડો સ્પષ્ટ કરે છે કે શૈક્ષણિક સંસ્થાઓમાં સૈદ્ધાંતિક જ્ઞાન તો આપવામાં આવે છે, પરંતુ ઉદ્યોગો અને કંપનીઓને જે વ્યવહારુ કૌશલ્યની જરૂર છે, તેનો વિદ્યાર્થીઓમાં ભારે અભાવ જોવા મળે છે.

આ પરિસ્થિતિને સુધારવા માટે NITI આયોગે ફ્લેક્સિબલ લર્નિંગ, ઓછી કિંમતના કૌશલ્ય અભ્યાસક્રમો અને 'Earn While You Learn' (ભણવાની સાથે કમાણી) જેવી સિસ્ટમ લાગુ કરવાની ભલામણ કરી છે. ખાસ કરીને મહિલાઓ માટે ટૂંકા ગાળાના તાલીમ કાર્યક્રમો અને સ્થાનિક સ્તરે સ્વ-રોજગારની તકો ઊભી કરવા પર ભાર મૂકવામાં આવ્યો છે. વર્ષ ૨૦૪૭ સુધીમાં ભારતને વિકસિત દેશ બનાવવાના લક્ષ્યને હાસલ કરવા માટે દેશના આ વિશાળ યુવાધનને પરંપરાગત ઢાંચામાંથી બહાર કાઢીને નવી ટેકનોલોજી અને ઉભરતા ક્ષેત્રો માટે સક્ષમ બનાવવું અત્યંત જરૂરી છે.