નવી દિલ્હી : દેશની રાજધાની દિલ્હીમાં મોસમી વાયરલ તાવ અને સ્વાઈન ફ્લૂ (H1N1) ના કેસોમાં અચાનક થયેલા ચિંતાજનક ઉછાળાને પગલે આરોગ્ય તંત્ર દોડતું થઈ ગયું છે. દિલ્હીમાં અત્યાર સુધીમાં ઈન્ફ્લુએન્ઝા-એ ના ૨,૩૯૨ જેટલા ગંભીર કેસો નોંધાયા છે, જેમાં માત્ર સ્વાઈન ફ્લૂના ૧,૭૭૭ કેસો સામે આવતાં નાગરિકો અને તબીબોમાં ભારે ચિંતા વ્યાપી ગઈ છે. સ્થિતિની ગંભીરતાને ધ્યાનમાં રાખીને દિલ્હીના આરોગ્ય વિભાગે તમામ સરકારી અને ખાનગી હોસ્પિટલો તેમજ અધિકારીઓ માટે કડક આરોગ્ય સલાહકાર (Health Advisory) જારી કરી છે.

દિલ્હીના આરોગ્ય મંત્રી પંકજ કુમાર સિંહે પરિસ્થિતિ અંગે માહિતી આપતાં જણાવ્યું હતું કે કેન્દ્ર સરકાર અને દિલ્હીનું આરોગ્ય વિભાગ દરરોજના કેસો પર સતત નજર રાખી રહ્યા છે. દિલ્હી સ્ટેટ હેલ્થ મિશન અને Integrated Disease Surveillance Programme (IDSP) ના સંયુક્ત પોર્ટલ દ્વારા રિયલ-ટાઈમ મોનિટરિંગ કરવામાં આવી રહ્યું છે. તેમણે નાગરિકોને આશ્વાસન આપતાં કહ્યું હતું કે દિલ્હીની હોસ્પિટલોમાં તબીબો, આઈસોલેશન બેડ, ઓક્સિજન અને જરૂરી દવાઓનો પૂરતો જથ્થો ઉપલબ્ધ છે, તેથી ગભરાવાની જરૂર નથી પરંતુ સાવચેતી રાખવી અનિવાર્ય છે.

વધતા સંક્રમણને અટકાવવા માટે દિલ્હી સરકારે જાહેર જનતાને ભીડભાડ વાળી જગ્યાઓ પર માસ્ક પહેરવા, વારંવાર સાબુથી હાથ ધોવા અને શ્વસન સ્વચ્છતા જાળવવા અપીલ કરી છે. જાહેરમાં થૂંકવા પર કડક મનાઈ ફરમાવવામાં આવી છે. તાવ, ઉધરસ, ગળામાં દુખાવો કે શ્વાસ લેવામાં તકલીફ જેવા લક્ષણો દેખાય તો તરત જ તબીબી સલાહ લેવા જણાવાયું છે. LNJP અને સફદરજંગ જેવી મોટી હોસ્પિટલોમાં વિશેષ આઈસોલેશન વોર્ડ કાર્યરત કરાયા છે, જ્યારે એપોલો અને ફોર્ટિસ જેવી હોસ્પિટલો ટેલિકોન્સલ્ટેશન દ્વારા દર્દીઓને ઘરે બેઠા જ સારવાર સુવિધા પૂરી પાડી રહી છે.