મંત્રીઓના બંગલા પાછળ રૂ.૫૪૭ કરોડનો ધુમાડોઃ શાળાઓની દયનીય સ્થિતિ પર CJPના સરકાર પર આકરા પ્રહાર
સરકારી મિલકતો અને સુરક્ષાના માપદંડો મુજબ જાળવણી ખર્ચ થાય છેઃ શિક્ષણ ક્ષેત્રે બજેટમાં સતત વધારો કરવામાં આવ્યોઃ CJP ના દાવાઓને ભાજપે ફગાવી દીધા
નવી દિલ્હી, તા.૨૪: લુટિયન્સ દિલ્હીના સીમાચિﾎરૂપ સરકારી બંગલાઓના ભવ્ય નવીનીકરણ અને જાળવણી પર થયેલા અબજો રૂપિયાના ખર્ચ અંગે માહિતી અધિકાર દ્વારા બહાર આવેલા આંકડાઓએ દેશમાં એક નવો આકરો રાજકીય વિવાદ છેડી દીધો છે. કેન્દ્રીય મંત્રીઓના આવાસની જાળવણી પાછળ છેલ્લા ૧૨ વર્ષ દરમિયાન રૂ.૫૪૭.૬૮ કરોડથી પણ વધુ રકમનો ધુમાડો કરવામાં આવ્યો છે, જેમાં માત્ર વર્ષ ૨૦૨૫-૨૬માં જ વાર્ષિક ખર્ચ વધીને રૂ.૯૨.૩૫ કરોડના રેકોર્ડ સ્તરે પહોંચી ગયો છે. એક તરફ દિલ્હીના આ શાનદાર બંગલાઓ પર કરોડો રૂપિયાનું પાણી ફેરવાઈ રહ્યું છે, ત્યારે બીજી તરફ દેશના ગ્રામીણ વિસ્તારોમાં આવેલી સરકારી શાળાઓ મૂળભૂત સુવિધાઓ મેળવવા માટે વલખાં મારી રહી છે. આ આંકડા સામે આવ્યા બાદ યુવા આંદોલન અને વિપક્ષી નેતાઓએ સરકાર સામે તીખા પ્રહારો કર્યા છે.
સરકારની આ ઉડાઉ નીતિ સામે કોકરોચ જનતા પાર્ટી અને તેના સ્થાપક અભિજીત દીપકે આક્રમક વલણ અપનાવ્યું છે. તેમણે સોશિયલ મીડિયા પર આકરા પ્રશ્નો ઉઠાવતા જણાવ્યું હતું કે આ પૈસાથી દેશમાં ઓછામાં ઓછી ૧૦ આધુનિક અને વિશ્વસ્તરીય શાળાઓનું નિર્માણ થઈ શકયું હોત. CJP એ ૧૫ ઓગસ્ટથી દેશવ્યાપી સ્કૂલ ઠીક કરો ઝુંબેશની શરૂઆત કરી છે. આ ઝુંબેશ હેઠળ નાગરિકોને ગ્રામીણ શાળાઓનું સામાજિક ઓડિટ કરવા, વીજળી, પીવાનું સ્વચ્છ પાણી, શૌચાલય, અને મધ્યાહન ભોજન જેવી પ્રાથમિક સુવિધાઓની ગેરહાજરીનું વિડિયો પુરાવા સાથે ડોકયુમેન્ટેશન કરવા અપીલ કરવામાં આવી છે.
CJP ના નેતાઓએ PM Cares Fund ની વિશાળ રકમનો મુદ્દો પણ આક્રમક રીતે આગળ ધપાવ્યો છે, જે વધીને રૂ.૮,૪૫૨ કરોડથી વધુ થઈ ગઈ છે. દીપકેનો દાવો છે કે આટલા ભંડોળમાંથી રૂ.૮ કરોડના ખર્ચે બનતી ૧,૦૦૦ થી વધુ મોડેલ શાળાઓનું દેશભરમાં નિર્માણ શકય છે. CJP મુજબ દેશમાં ભંડોળની અછત નથી, પણ રાજકીય ઇચ્છાશક્તિનો ઘોર અભાવ છે. વિરોધ પ્રદર્શનથી આગળ વધીને હવે આ સંગઠને સરપંચ ચેલેન્જ પણ લોન્ચ કરી છે, જેમાં પોતાની ગામડાની શાળા સુધારનાર સરપંચોને સાર્વજનિક મંચો પર સન્માનિત કરવામાં આવશે.
સામે પક્ષે, સેન્ટ્રલ પબ્લિક વર્ક્સ ડિપાર્ટમેન્ટ અને સરકારી વર્તુળોએ આ ખર્ચને વ્યાજબી ઠેરવતા દાવો કર્યો છે કે લુટિયન્સ ઝોનના બંગલાઓ લગભગ એક સદી જૂના વારસા સમાન સ્થાપત્ય છે. ઉધઈનો ઉપદ્રવ, લીકેજ અને જૂની પ્લમ્બિંગ સિસ્ટમની મરામત માટે આ રકમ જરૂરી હતી. ભાજપે વિપક્ષોને પડકાર આપતા કહ્યું છે કે જો વિરોધી પક્ષો શાળાઓની સ્થિતિ સુધારવા માંગતા હોય, તો પોતાના શાસન હેઠળના રાજ્યો અને દિલ્હીના પૂર્વ રાજ્ય સંકુલમાં થયેલા કરોડોના રીનોવેશન અને ભ્રષ્ટાચારના હિસાબ આપે.
(3:41 PM IST)
છેલ્લા 8 દિવસમાં સૌથી લોકપ્રિય 
