નવી દિલ્હી, તા.૨૪: દિલ્હીના ઐતિહાસિક જંતર-મંતર ખાતે વિદ્યાર્થીઓના વિરોધ પ્રદર્શન દરમિયાન મહિલાઓ સાથે થયેલી કથિત છેડતી અને સતામણીના કેસમાં દેશની સર્વોચ્ચ અદાલતે અત્યંત સખત વલણ અપનાવ્યું છે. ભારતના મુખ્ય ન્યાયાધીશ (CJI) સૂર્યકાંતે સ્પષ્ટ શબ્દોમાં જણાવ્યું છે કે આ સમગ્ર ઘટનાની તપાસ માટે રચાયેલી ઉચ્ચ સ્તરીય તપાસ સમિતિને મહિલા આંદોલનકારીઓની જાતીય સતામણીના કેસોની તપાસ સૌથી પહેલાં અને પ્રાથમિકતાના ધોરણે કરવાની સૂચના આપવામાં આવી છે.

જાતીય હુમલા અંગે સમિતિ આપશે વચગાળાનો રિપોર્ટ
નવી દિલ્હી ખાતે યોજાયેલા ૧૧મા 'બ્રિક્સ પ્લસ લીગલ ફોરમ'ના ઉદ્ઘાટન સત્ર દરમિયાન વાત કરતા CJI સૂર્યકાંતે જણાવ્યું હતું કે, જંતર-મંતર ખાતે વિદ્યાર્થીઓ પર થયેલી પોલીસ કાર્યવાહી અને મહિલા વિરોધીઓ સામે થયેલા દુર્વ્યવહારની ઘટના અત્યંત સંવેદનશીલ છે. તપાસ સમિતિ આ મામલે ટૂંક સમયમાં જ પોતાનો વચગાળાનો અહેવાલ (Interim Report) સુપ્રીમ કોર્ટ સમક્ષ રજૂ કરશે. આ ઉપરાંત, પીડિત મહિલાઓ પોતાની રજૂઆત સીધી કરી શકે તે માટે સમિતિના અધ્યક્ષને એક ખાસ નોડલ અધિકારીની નિમણૂક કરવાની સત્તા પણ આપવામાં આવી છે.

વકીલ શોભા ગુપ્તાએ સ્વતઃ સંજ્ઞાન (Suo Motu) ની માંગ કરી
અગાઉ સુપ્રીમ કોર્ટમાં સુનાવણી દરમિયાન વરિષ્ઠ એડવોકેટ શોભા ગુપ્તાએ કોર્ટનું ધ્યાન દોરતા માંગ કરી હતી કે મહિલા આંદોલનકારીઓ સામે પોલીસ અધિકારીઓ દ્વારા કરવામાં આવેલી છેડતી અને અયોગ્ય વર્તનની કોર્ટે પોતે સ્વતઃ સંજ્ઞાન લેવી જોઈએ. તેમણે કોર્ટને જણાવ્યું કે આંદોલનકારી વિધાર્થીનીઓએ સોશિયલ મીડિયા પર પોતાની સાથે થયેલા ઉત્પીડનની દર્દનાક વાર્તાઓ શેર કરી છે.

તેમણે માંગ કરી હતી કે આ કેસમાં પીડિતાઓ સીધી ફરિયાદ નોંધાવી શકે તે માટે દરેક વિસ્તારમાં જિલ્લા ન્યાયાધીશની નિમણૂક કરવી જોઈએ. જોકે, જસ્ટિસ જોયમલ્યા બાગચીએ સ્પષ્ટ કર્યું હતું કે આ અંગે અલગથી રિટ અરજીઓ દાખલ થયેલી છે અને તપાસ સમિતિ આ બાબતને જ પ્રાથમિકતા આપી રહી છે.

જસ્ટિસ આર. સુભાષ રેડ્ડીના નેતૃત્વમાં ૫ સભ્યોની કમિટી
સુપ્રીમ કોર્ટે દિલ્હી અને દેશના અન્ય ભાગોમાં ૨૦ જુલાઈના રોજ જંતર-મંતર ખાતે વિદ્યાર્થીઓ પર થયેલી પોલીસ બર્બરતાની તપાસ માટે પૂર્વ ન્યાયાધીશ આર. સુભાષ રેડ્ડીના નેતૃત્વ હેઠળ ૫ સભ્યોની ઉચ્ચ સ્તરીય સમિતિની રચના કરી છે.

આ સમિતિમાં નીચે મુજબના અનુભવી સભ્યોનો સમાવેશ થાય છે:

•    જસ્ટિસ આર. સુભાષ રેડ્ડી (પૂર્વ ન્યાયાધીશ, સુપ્રીમ કોર્ટ - અધ્યક્ષ)

•    જસ્ટિસ રવિશંકર ઝા (પૂર્વ મુખ્ય ન્યાયાધીશ, પંજાબ અને હરિયાણા હાઇકોર્ટ)

•    જસ્ટિસ શાલિન્દર કૌર (પૂર્વ ન્યાયાધીશ, દિલ્હી હાઇકોર્ટ)

•    ઋષિ કુમાર શુક્લા (પૂર્વ ડિરેક્ટર, CBI)

•    એલ.આર. બિશ્નોઈ (પૂર્વ ડિરેક્ટર જનરલ ઓફ પોલીસ, મેઘાલય)

NEET પેપર લીક અને ધર્મેન્દ્ર પ્રધાનના રાજીનામાની હતી માંગ
ઉલ્લેખનીય છે કે રાષ્ટ્રીય પાત્રતા કમ પ્રવેશ પરીક્ષા (NEET) અને અન્ય મહત્વપૂર્ણ સ્પર્ધાત્મક પરીક્ષાઓના પ્રશ્નપત્રો લીક થવાના વિરોધમાં કોંગ્રેસ સમર્થિત વિદ્યાર્થી સંગઠનો અને 'કોકરોચ જનતા પાર્ટી' (CJP) ના "સાંસદ ચલો" આહ્વાન હેઠળ હજારો વિદ્યાર્થીઓ જંતર-મંતર પર એકઠા થયા હતા. આ વિદ્યાર્થીઓ તત્કાલીન કેન્દ્રીય શિક્ષણ પ્રધાન ધર્મેન્દ્ર પ્રધાનના રાજીનામાની માંગ કરી રહ્યા હતા.

તે સમયે થયેલા ઘર્ષણ દરમિયાન સુરક્ષા દળો દ્વારા મહિલાઓ સાથે કરાયેલી હિંસા અને છેડતીની ઘટનાઓને સુપ્રીમ કોર્ટે અત્યંત ગંભીર ગણાવીને સમિતિને તેની સંવેદનશીલતા સમજીને તપાસ વેગવંતી કરવાનો આદેશ આપ્યો છે.