નવી દિલ્હી: ટ્રેનની મુસાફરી દરમિયાન નીચેની બર્થ પર બેઠેલા મુસાફર અને અન્ય સવારીઓ વચ્ચે સામાન રાખવા બાબતે અવારનવાર દલીલો કે ઝઘડા જોવા મળે છે. સામાન્ય રીતે ઘણા લોકો એવું માને છે કે જે મુસાફરની નીચલી બર્થની ટિકિટ હોય, તે સીટ નીચેની સમગ્ર જગ્યા પર માત્ર તેનો જ એકછત્ર અધિકાર છે. જોકે, ભારતીય રેલવેના સત્તાવાર નિયમો મુજબ આ માન્યતા તદ્દન ખોટી અને ભ્રામક છે.

રેલવેના નિયમ અનુસાર, કોઈ મુસાફર પાસે લોઅર બર્થની ટિકિટ હોય તોપણ સીટ નીચેની જગ્યા પર મિડલ  અને અપર  બર્થના સાથી મુસાફરોનો પણ સમાન હક રહે છે. એક જ કૂપ કે કેબિનમાં મુસાફરી કરી રહેલા તમામ મુસાફરો પોતાની બેગ કે સામાન નીચલી સીટ નીચે વ્યવસ્થિત રીતે ગોઠવી શકે છે. દરેક મુસાફર આરામદાયક મુસાફરી કરી શકે તે માટે પરસ્પર સહયોગ અને સમજદારીપૂર્વક જગ્યાનો ઉપયોગ કરવાની સલાહ રેલવે દ્વારા આપવામાં આવે છે.

આ ઉપરાંત, રેલવેએ મુસાફરો માટે સામાનના વજનની મર્યાદા પણ નક્કી કરેલી છે. સ્લીપર ક્લાસમાં 40 કિલો, એસી 3-ટાયર/2-ટાયરમાં 40 થી 50 કિલો અને એસી ફર્સ્ટ ક્લાસમાં 70 કિલો સુધીનો સામાન વિના મૂલ્યે લઈ જઈ શકાય છે. જો ટ્રેનમાં સામાન મૂકવા બાબતે સાથી મુસાફર સાથે કોઈ વિવાદ કે અણબનાવ થાય, તો શારીરિક ઝઘડો કરવાને બદલે તુરંત TTE નો સંપર્ક કરવો જોઈએ અથવા રેલવેની ‘RailMadad’ એપ અને 139 હેલ્પલાઈન નંબર પર ફરિયાદ નોંધવી જોઈએ.