નવી દિલ્હી:  ટ્રેનની મુસાફરી આરામદાયક અને આનંદદાયક માનવામાં આવે છે, પરંતુ મુસાફરી દરમિયાન કરવામાં આવતી નાની ભૂલ પણ મોટી મુશ્કેલીમાં મૂકી શકે છે. ઘણીવાર પરિવાર કે મિત્રો સાથે મુસાફરી કરતી વખતે એકસાથે સીટ ન મળવા પર લોકો આપસમાં જ સીટની અદલાબદલી કરી લેતા હોય છે. જોકે, ભારતીય રેલવેના નિયમો મુજબ TTEની પૂર્વ પરવાનગી વગર પોતાની અનામત સીટ છોડીને બીજાની સીટ પર કબજો કરવો એ ગેરકાયદેસર છે. જો ટ્રેનમાં કોઈ સીટ ખાલી હોય, તો માત્ર TTE જ સત્તાવાર રીતે તમને તે સીટ ફાળવી શકે છે.

રેલવેના નિયમોનું ઉલ્લંઘન કરીને જો કોઈ મુસાફર અન્ય વ્યક્તિની અનામત સીટ પર બેઠેલો કે સૂતેલો માલૂમ પડે, તો TTE તેની પાસેથી ₹૨૫૦ નો દંડ વસૂલ કરી શકે છે. આ ઉપરાંત, પોતાની કન્ફર્મ ટિકિટ કે સીટ અન્ય કોઈ મુસાફરને વેચવી અથવા ટ્રાન્સફર કરવી એ પણ ગંભીર ગુનો છે. રેલવે એક્ટની કલમ ૧૪૩ હેઠળ અધિકૃત પરવાનગી વગર ટિકિટ વેચવા બદલ ₹૧૦,૦૦૦ સુધીનો દંડ અને ૩ વર્ષ સુધીની જેલની સજાની જોગવાઈ કરવામાં આવી છે.

અન્ય એક મહત્વપૂર્ણ બાબત વેઈટિંગ લિસ્ટ ટિકિટ સાથે મુસાફરી કરવા અંગેની છે. ચાર્ટ તૈયાર થયા પછી પણ જો ટિકિટ વેઈટિંગ લિસ્ટમાં જ રહે, તો તે ટિકિટ પર સ્લીપર કે એસી કોચમાં મુસાફરી કરવી એ કાનૂની ગુનો છે. આવા કિસ્સામાં TTE મુસાફર પાસેથી ₹૨૫૦ નો વિશિષ્ટ દંડ અને મુસાફરીના અંતર મુજબ ટિકિટનું પૂરું ભાડું વસૂલ કરી શકે છે. આથી, કોઈ પણ પ્રકારની ઝંઝટ કે જેલ-દંડથી બચવા માટે રેલવેના નિયમોનું પાલન કરવું અનિવાર્ય છે.