નવી દિલ્હી : છેલ્લા બે મહિનાથી પોતાના પરિણામની અધીરાઈથી રાહ જોઈ રહેલા લાખો ઉમેદવારો માટે રાહતના સમાચાર આવ્યા છે. નેશનલ ટેસ્ટિંગ એજન્સી (NTA) દ્વારા સોશિયલ મીડિયા પ્લેટફોર્મ X પર સત્તાવાર માહિતી આપવામાં આવી છે કે UGC NETનું પરિણામ અને ફાઇનલ આન્સર કી આ જ સપ્તાહે જાહેર કરી દેવામાં આવશે. પ્રોવિઝનલ આન્સર કી જાહેર થયા બાદથી જ ઉમેદવારોમાં પરિણામને લઈને ભારે ઉત્સુકતા જોવા મળી રહી હતી, જેને લઈને હવે એજન્સીએ મોટી સ્પષ્ટતા કરી છે.

૮૪ વિષયોનું રિઝલ્ટ એકસાથે થશે જાહેર

એનટીએની અધિકૃત પોસ્ટ મુજબ, યુજીસી નેટના તમામ ૮૪ વિષયોના પરિણામ અને આખરી ઉત્તરવહી (Final Answer Key) વેબસાઇટ પર ઉપલબ્ધ કરાવાશે. એજન્સીએ અફવાઓથી બચવા અને માત્ર સત્તાવાર વેબસાઇટ ugcnet.nta.nic.in પરથી જ વિગતો ચકાસવા ઉમેદવારોને સલાહ આપી છે.

૩ વિષયોની પરીક્ષા રદ થતાં સર્જાયો હતો વિવાદ

આ અગાઉ પ્રોવિઝનલ આન્સર કી જાહેર કરતી વખતે NTAએ અંગ્રેજી, કોમર્સ અને સમાજશાસ્ત્ર (Sociology) જેવા ત્રણ મુખ્ય વિષયોની પરીક્ષા રદ કરવાની જાહેરાત કરી હતી. પ્રશ્નપત્રોમાં વ્યાકરણની ભૂલો અને ક્ષતિઓ સામે આવ્યા બાદ ઉમેદવારોએ પેપર AI (આર્ટિફિશિયલ ઇન્ટેલિજન્સ) દ્વારા તૈયાર કરાયા હોવાનો આક્ષેપ કર્યો હતો. જોકે NTAએ AIના ઉપયોગના દાવાને સ્પષ્ટપણે ફગાવી દીધો હતો અને પુનઃપરીક્ષાની તારીખો પણ જાહેર કરી હતી.

આ રીતે ચેક કરી શકાશે તમારું પરિણામ

૧. પરિણામ જોવા માટે સૌથી પહેલાં અધિકૃત વેબસાઇટ ugcnet.nta.nic.in ની મુલાકાત લો.

૨. હોમપેજ પર આપેલા UGC NET Result/Scorecard લિંક પર ક્લિક કરો.

૩. તમારો એપ્લિકેશન નંબર (Application Number) અને જન્મતારીખ (DOB) દાખલ કરીને લોગ-ઈન કરો.

૪. સિક્યોરિટી પિન કેપ્ચા ઉમેરી સબમિટ કરતાં જ તમારું પરિણામ સ્ક્રીન પર આવી જશે.