બીડ, તા.27: મહારાષ્ટ્રના બીડ જિલ્લામાં જમીન સંપાદનના વળતરમાં આચરવામાં આવેલા ₹૭૩.૦૪ કરોડના બહુચર્ચિત કૌભાંડમાં તપાસ એજન્સીઓને મોટી સફળતા સાંપડી છે. આ કૌભાંડની ચાલી રહેલી તપસીલવાર તપાસમાં જિલ્લા ટ્રેઝરી ઓફિસર લહુ ગાલગુંડેની સીધી સંડોવણી ખુલ્લી પડતાં હવે તેમને ચાર્જશીટમાં મુખ્ય શંકાસ્પદ આરોપી તરીકે નામજદ કરવામાં આવ્યા છે.

તપાસ એજન્સીઓના જણાવ્યા મુજબ, ગાલગુંડેની સહી અને અધિકૃતતાનો ઉપયોગ કરીને કૌભાંડીઓએ વચેટિયાઓ અને કાગળ પરના લાભાર્થીઓના બેંક ખાતાઓમાં કરોડો રૂપિયાની વધારાની રકમ બારોબાર ટ્રાન્સફર કરી હતી. બનાવટી સરકારી આદેશોના આધારે ફુગાવેલા ભંડોળનું વિતરણ કરવામાં ગાલગુંડેએ મુખ્ય ભૂમિકા ભજવી હતી. કૌભાંડનો ભંડાસફોડ થયો ત્યારથી જ લહુ ગાલગુંડે ફરાર છે અને પોલીસની ટીમો તેને પકડવા માટે સતત દરોડા પાડી રહી છે.

બીજી તરફ, આ કરોડોના કૌભાંડના મુખ્ય સૂત્રધાર અને બીડના પૂર્વ જિલ્લા કલેક્ટર અવિનાશ પાઠકને પણ કોઈ રાહત મળી નથી. પાઠક પર પોતાની બદલી થયા બાદ ૧૫૪ જેટલા બેક-ડેટેડ (જૂની તારીખના) બનાવટી આદેશો જારી કરીને ₹૩૧૦ કરોડ સુધીના બોગસ વળતર દાવા ઊભા કરવાનો ગંભીર આરોપ છે. બોમ્બે હાઈકોર્ટ અને સેશન્સ કોર્ટ બંનેએ તેમની જામીન અરજી ફગાવી દીધી છે. હેન્ડરાઇટિંગ એક્સપર્ટ્સે પણ પુષ્ટિ કરી છે કે બનાવટી દસ્તાવેજો પર પાઠકની જ સહીઓ છે.

ઉલ્લેખનીય છે કે, મહારાષ્ટ્રને હચમચાવી દેનારા આ બહુચર્ચિત જમીન કૌભાંડમાં પૂર્વ કલેક્ટર ઉપરાંત ૫ વકીલો, ૨ મહેસૂલ સહાયકો અને ૩ કોન્ટ્રાક્ટ કર્મચારીઓ સહિત અનેક ઉચ્ચ અધિકારીઓ અને કર્મચારીઓની સિન્ડિકેટ સામેલ હોવાનું સામે આવ્યું છે.