કોલકાતા, તા.27: પશ્ચિમ બંગાળના રાજકારણમાં એક અત્યંત નાટકીય વળાંક સામે આવ્યો છે. તૃણમૂલ કોંગ્રેસ (TMC)માંથી બળવો કરીને અલગ થયેલા ૨૦ સાંસદોના નવા જૂથ એનસીપીઆઈ (NCPI)ને ભારતીય જનતા પાર્ટી (BJP)એ મોટો રાજકીય આંચકો આપ્યો છે. સયાની ઘોષ, કાકોલી ઘોષ દસ્તીદાર અને સુદીપ બંદોપાધ્યાય જેવા વરિષ્ઠ નેતાઓની આગેવાની હેઠળના આ બળવાખોર જૂથે આગામી કોલકાતા મ્યુનિસિપલ કોર્પોરેશન (KMC) ચૂંટણી NDAના બેનર હેઠળ ભાજપ સાથે મળીને લડવાની જાહેરાત કરી હતી, જેને ભાજપે સ્પષ્ટપણે ફગાવી દીધી છે.

KMC ચૂંટણી પ્રભારી અને કેન્દ્રીય રાજ્ય મંત્રી સુકાંત મજુમદારે ન્યૂ ટાઉન ખાતે પત્રકાર પરિષદમાં સ્પષ્ટ કર્યું હતું કે, "બંગાળમાં ભાજપનો કોઈ સ્થાનિક સાથી પક્ષ નથી અને પાર્ટી આ ચૂંટણી પણ એકલા હાથે જ લડશે." ભાજપના આંતરિક સૂત્રોનું માનવું છે કે જે ભ્રષ્ટ TMC નેતાઓ સામે ભાજપ વર્ષોથી લડી રહ્યો છે, તેમને જ હવે ગઠબંધન કરીને ચૂંટાવી લાવવા એ પાર્ટીના કાર્યકરો અને વિચારધારા માટે અત્યંત દુર્ભાગ્યપૂર્ણ ગણાશે.

આ રાજકીય ખેંચતાણથી ભાજપ માટે કેન્દ્ર સ્તરે પણ સમીકરણો ગુચવાઈ શકે છે. સંસદના બંને ગૃહોમાં મહત્વના સીમાંકન બિલ જેવા પ્રસ્તાવિત બિલો પસાર કરવા માટે એનડીએને આ ૨૦ બળવાખોર સાંસદોના સમર્થનની જરૂરિયાત છે. જો આ જૂથ ભાજપના આ નિર્ણયથી નારાજ થાય તો કેન્દ્ર સરકાર માટે બે તૃતીયાંશ બહુમતી મેળવવી મુશ્કેલ બની શકે છે. જોકે, ચર્ચા એવી પણ છે કે ભાજપ કેન્દ્રમાં એક-બે મંત્રીપદ આપીને આ અસંતોષને શમાવવાનો પ્રયાસ કરી શકે છે. ડિસેમ્બર ૨૦૨૬માં યોજાનારી KMC ચૂંટણી પહેલાં આ રાજકીય ઘમાસાણ વધુ તીવ્ર બનવાના એંધાણ છે.