નવી દિલ્હી, તા.27: તહેવારો, રજાઓ કે લગ્નની સિઝનમાં ટ્રેનમાં કન્ફર્મ ટિકિટ મેળવવી અત્યંત મુશ્કેલ બની જતી હોય છે. ઘણા મુસાફરો વેઇટિંગ ટિકિટ સાથે જ ટ્રેનમાં મુસાફરી કરવાનું જોખમ લેતા હોય છે. પરંતુ ભારતીય રેલવેના નિયમો અનુસાર, કન્ફર્મ ટિકિટ વિના આરક્ષિત (Reserved) કોચમાં ચઢવું તમને ભારે પડી શકે છે. જો ઈ-ટિકિટ વેટિંગમાં રહે તો તે ચાર્ટ તૈયાર થતાં જ ઓટોમેટિક કેન્સલ થઈ જાય છે અને તેના પર મુસાફરી કરવી ગેરકાયદેસર ગણાય છે.

જો તમારે કોઈ કટોકટીના કારણે તાત્કાલિક મુસાફરી કરવી પડે તેમ હોય તો ટ્રેનમાં બારોબાર ચઢવાને બદલે સ્ટેશન પરથી પહેલા પ્લેટફોર્મ ટિકિટ ખરીદવી જોઈએ. ત્યારબાદ ટ્રેનમાં કે પ્લેટફોર્મ પર હાજર TTE (ટ્રાવેલિંગ ટિકિટ એક્ઝામિનર) નો સંપર્ક કરી તમારી ઈમરજન્સી પરિસ્થિતિ સમજાવવી જોઈએ. જો ટ્રેનમાં કોઈ બર્થ કે સીટ ખાલી હશે, તો TTE નિયમાનુસાર જરૂરી ચાર્જ વસૂલીને તમને મુસાફરી માટેની માન્ય સ્લિપ બનાવી આપશે.

રેલવેના નવા નિયમો મુજબ, માન્ય ટિકિટ વિના કે સંપૂર્ણ વેઇટિંગ ટિકિટ પર રિઝર્વ્ડ કોચમાં મુસાફરી કરવા બદલ લઘુત્તમ દંડ ₹૨૫૦થી વધારીને ₹૫૦૦ કરવામાં આવ્યો છે, જેમાં અંતર મુજબનું ભાડું અલગથી ઉમેરાય છે. જો કોઈ મુસાફર દંડ ભરવાનો ઇનકાર કરે તો તેની સામે કાનૂની કાર્યવાહી થઈ શકે છે, જેમાં ૬ મહિના સુધીની જેલ અથવા ₹૫૦૦ સુધીનો વધારાનો દંડ કે બંને સજા થઈ શકે છે. તેથી મુસાફરી કરતા પહેલાં PNR સ્ટેટસ ચકાસવું અને મુસાફરી દરમિયાન સરકારી ઓળખપત્ર સાથે રાખવું અત્યંત જરૂરી છે.