ચેન્નાઈ, તા.27: આંખની રોશની ગુમાવી ચૂકેલા અને કોર્નિયલ ટ્રાન્સપ્લાન્ટ માટે ડોનરની રાહ જોઈ રહેલા લાખો દર્દીઓ માટે એક આશાનું નવું કિરણ પ્રગટ્યું છે. તમિલનાડુના મુખ્યમંત્રી સી. જોસેફ વિજયે ચેન્નાઈ સ્થિત વિશ્વપ્રસિદ્ધ 'ડૉ. અગ્રવાલ આઈ હોસ્પિટલ' ખાતે વિશિષ્ટ પિનહોલ પ્યુપિલોપ્લાસ્ટી (PPP) સેન્ટરનું ભવ્ય ઉદ્ઘાટન કર્યું છે. આ ક્રાંતિકારી સેન્ટર અનિયમિત કોર્નિયા, ડાઘ અને આંખની જટિલ વિકૃતિઓ ધરાવતા દર્દીઓની દ્રષ્ટિ સુધારવા માટે અત્યાધુનિક માઈક્રોસર્જિકલ સારવાર આપશે.

આ તકનીકના શોધક અને ડૉ. અગ્રવાલ આઈ હોસ્પિટલના ચેરમેન ડૉ. અમર અગ્રવાલે જણાવ્યું હતું કે, સમગ્ર વિશ્વમાં દર વર્ષે ૨ થી ૫ કરોડ લોકો ડોનર કોર્નિયાની રાહ જોતા હોય છે. કોર્નિયા ટ્રાન્સપ્લાન્ટમાં ડોનરની અછત ઉપરાંત ટ્રાન્સપ્લાન્ટ રિજેક્શન અને આજીવન દવાઓ લેવાનું જોખમ રહેલું છે. પિનહોલ પ્યુપિલોપ્લાસ્ટી (PPP) ટેકનિકમાં કોર્નિયાના ડાઘને દૂર કરવાને બદલે, કોર્નિયાના સ્પષ્ટ ભાગમાં એક અત્યંત નાનો પિનહોલ બનાવીને પ્રકાશને સીધો રેટિના સુધી પહોંચાડવામાં આવે છે. આનાથી વિકૃત પ્રકાશ કિરણો અટકે છે અને દર્દીને સ્પષ્ટ દ્રષ્ટિ મળે છે.

ડૉ. અગ્રવાલે વધુમાં ઉમેર્યું કે આ અનોખી તકનીક હવે અમેરિકા, રશિયા અને યુરોપ જેવા દેશોમાં અપનાવવામાં આવી રહી છે. ચેન્નાઈ ખાતે શરૂ કરાયેલા આ નવા સમર્પિત સેન્ટરનો મુખ્ય હેતુ વધુમાં વધુ દર્દીઓને આ દિવ્ય તકનીકનો લાભ આપવાનો છે. આ ઉપરાંત, વિશ્વભરના આંખના ડોક્ટરોને અહીં PPP સર્જરીની વિશેષ તાલીમ આપવામાં આવશે, જેથી વૈશ્વિક સ્તરે વધુ નિષ્ણાતો તૈયાર કરી શકાય. આ પ્રસંગે હોસ્પિટલના ડિરેક્ટર ડૉ. અથિયા અગ્રવાલ, CEO આદિલ અગ્રવાલ સહિત અનેક અગ્રણી તબીબો ઉપસ્થિત રહ્યા હતા.