બેઇજિંગ/કાઠમંડુ, તા.27: પૂર અને હિમસ્ખલનની ભયાનક આફતથી ઝઝૂમી રહેલા નેપાળ અને તિબેટ સરહદે કુદરતી તબાહીનો બીજો મોટો ખતરો તોળાઈ રહ્યો છે. નેપાળમાં ભોટેકોશી નદીના ઊપલા પ્રવાહમાં બનેલું એક વિશાળ અવરોધક તળાવ (Barrier Lake) આગામી ૭૨ કલાકમાં ફાટી શકે છે તેવી સત્તાવાર ચેતવણી ચીનના જળ સંસાધન મંત્રાલય દ્વારા આપવામાં આવી છે. આ ચેતવણી બાદ નેપાળ અને તિબેટના નિચાણવાળા વિસ્તારોમાં તંત્રને હાઈ એલર્ટ પર મૂકી દેવામાં આવ્યું છે.

ચીની સત્તાવાળાઓના જણાવ્યા અનુસાર, તિબેટમાંથી નીકળતી ચોચેન ખોલા અને પુરપુ ત્સાંગપો નદીઓના સંગમ નજીક આ ભયાનક તળાવ આકાર પામ્યું છે. ગુરુવાર સવાર સુધીમાં જ આ તળાવમાં ૨૦ લાખ ઘન મીટર (૨ મિલિયન ક્યુબિક મીટર) પાણી જમા થઈ ચૂક્યું છે અને તે ઓવરફ્લો થવા લાગ્યું છે. આગામી ૩ દિવસમાં તળાવમાં વધુ ૩૦ લાખ ઘન મીટર પાણીનો ઉમેરો થવાની ગણતરી છે. જો આ તળાવનો બંધ તૂટશે તો ૫૦ લાખ ક્યુબિક મીટર પાણીનો ભયાનક સેલાબ અચાનક નીચે તરફ ધસી આવશે, જે માર્ગમાં આવતા તમામ ગામડાંઓ અને માળખાકીય સુવિધાઓનો સફાયો કરી શકે છે.

ઉલ્લેખનીય છે કે, નેપાળ-ચીન સરહદે આવેલા ભયાનક પૂરમાં અત્યાર સુધીમાં ૨૭૦થી વધુ લોકોના મોત થઈ ચૂક્યા છે અને સેંકડો લોકો દટાયેલા છે. રાસુવા જિલ્લાની ભોટેકોશી અને ત્રિશુલી નદીઓ પહેલેથી જ ઉભરાઈ રહી છે, ત્યારે આ કૃત્રિમ તળાવ ફાટવાના જોખમે રાહત અને બચાવ કામગીરીમાં ભારે ફફડાટ વ્યાપી ગયો છે. ચીની એન્જિનિયરો અને હાઇડ્રોલોજિકલ ટીમો સેટેલાઇટ અને કમ્પ્યુટર મોડેલિંગ દ્વારા પૂરના જોખમનું સતત મૂલ્યાંકન કરી રહી છે, જ્યારે નેપાળી વહીવટીતંત્રે નદી કિનારે વસતા લોકોને સુરક્ષિત સ્થળોએ ખસી જવા અને મુખ્ય ધોરીમાર્ગો પર ટ્રાફિક બંધ કરવા આદેશ આપ્યા છે.