મુંબઈ : દેશભરમાં ડુંગળીના છૂટક ભાવો રૂ. ૫૦ થી ૬૫ પ્રતિ કિલોગ્રામ સુધી પહોંચી જતાં આમ આદમીનું બજેટ ખોરવાયું છે. આ પરિસ્થિતિ વચ્ચે કેન્દ્રીય ખરીદી એજન્સીઓ (NAFED અને NCCF) દ્વારા ખરીદવામાં આવેલા ૧.૨ લાખ ટન બફર સ્ટોકમાંથી આશરે ૩૦ થી ૪૦ ટકા ડુંગળી કમોસમી વરસાદ, સડા અને અંકુરણને કારણે ખરાબ થઈ ગઈ હોવાના ચોંકાવનારા અહેવાલ સામે આવ્યા છે. સામાન્ય રીતે દર વર્ષે ૨૦ ટકા ડુંગળી બગડતી હોય છે, પરંતુ આ વર્ષે શેલ્ફ-લાઇફ ઘટવાને કારણે નુકસાન બે ગણું વધી ગયું છે, જેનાથી ભવિષ્યમાં ભાવો વધુ વધવાની આશંકા છે.

નાસિકના વિશાળ સ્ટોરેજ ક્ષેત્રમાં હાલ માત્ર ૨૫ ટકા જેટલો જ ડુંગળીનો જથ્થો બચ્યો છે. ઉપરાંત, ખરીફ પાકના વાવેતરમાં વિલંબ થવાથી નવો પાક હવે નવેમ્બરના મધ્ય સુધીમાં બજારમાં આવવાની શક્યતા છે. આથી ઓક્ટોબર અને સપ્ટેમ્બરના અંતમાં દેશમાં ડુંગળીની ગંભીર અછત સર્જાય તેવી શક્યતા છે. આ તંગીને પહોંચી વળવા અને ફુગાવો અટકાવવા માટે કેન્દ્ર સરકારે મોટો નિર્ણય લીધો છે. લાસલગાંવ રેલવે સ્ટેશનથી લગભગ ૫૦૦ ટન ડુંગળી ભરીને ‘કાંદા એક્સપ્રેસ’ ટ્રેન દિલ્હી માટે રવાના કરી દેવાઈ છે, જ્યારે રોડ માર્ગે પણ ટ્રકો દ્વારા જથ્થો મોકલવામાં આવી રહ્યો છે.

ગ્રાહક બાબતોના મંત્રાલય અનુસાર, કાંદા એક્સપ્રેસ દ્વારા પહોંચાડાયેલી આ ડુંગળી નાફેડ, NCCF અને કેન્દ્રીય ભંડારના આઉટલેટ્સ દ્વારા સામાન્ય જનતાને ₹૩૫ પ્રતિ કિલોની રાહત દરે સબ્સિડાઈઝ્ડ ભાવે વેચવામાં આવશે. દિલ્હી ઉપરાંત ટૂંક સમયમાં ચેન્નઈ, કોલકાતા, ગુવાહાટી અને મદુરાઈ જેવા મુખ્ય વપરાશ કેન્દ્રો તરફ પણ આવી જ ડેશ ટ્રેનો રવાના કરવામાં આવશે જેથી દેશના છૂટક બજારોમાં ભાવ પર કાબૂ રાખી શકાય.