નવી દિલ્હી તા.28: મધ્ય પૂર્વ (પશ્ચિમ એશિયા)માં ફાટી નીકળેલા યુદ્ધ અને હોર્મુઝ સ્ટ્રેટમાં સર્જાયેલા શિપિંગ સંકટ વચ્ચે ભારતે પોતાની ઊર્જા જરૂરિયાતો સુરક્ષિત કરવા માટે એક મહત્વપૂર્ણ સફળતા મેળવી છે. ઉત્તર આફ્રિકાનો દેશ અલ્જેરિયા હવે અમેરિકા અને યુએઈ (UAE) પછી ભારતમાં રસોઈ ગેસ (LPG)નો ત્રીજો સૌથી મોટો સપ્લાયર બની ગયો છે. કેપ્લરના વૈશ્વિક શિપિંગ ડેટા અનુસાર, અલ્જેરિયાએ ઓગસ્ટ મહિનામાં જ ભારતને 1,10,711 ટન LPG મોકલ્યો છે, જે ભારતના કુલ આયાતના લગભગ 10 ટકા જેટલો થાય છે.

ભારત વિશ્વમાં ઘરેલુ LPGનો બીજો સૌથી મોટો ગ્રાહક છે અને દેશના 34 કરોડથી વધુ ગ્રાહકો માટે દર વર્ષે 3.3 કરોડ ટન ગેસની જરૂરિયાત રહે છે. અત્યાર સુધી ભારત પોતાની 90% આયાત પશ્ચિમ એશિયાથી કરતું હતું. પરંતુ પશ્ચિમ એશિયામાં યુદ્ધના કારણે સપ્લાય ચેઈન ખોરવાતા ભારતે પોતાના સ્ત્રોતોનું વૈવિધ્યીકરણ કરવાનું શરૂ કર્યું છે. આ પરિસ્થિતિ વચ્ચે દેશની સરકારી તેલ કંપની ઈન્ડિયન ઓઈલ કોર્પોરેશને અલ્જેરિયાની સ્ટેટ કંપની 'સોનાટ્રાચ' (Sonatrach) સાથે વર્ષ 2027 સુધી દર મહિને 55,000 ટન LPG ખરીદવા માટેનો મોટો કરાર કર્યો છે. અલ્જેરિયાથી મળતો આ ગેસ સાઉદી અરામકો કરતાં પણ સસ્તા દરે ઉપલબ્ધ થઈ રહ્યો છે.

ઓગસ્ટ મહિનાના પુરવઠા આંકડાઓ અનુસાર, અમેરિકા 6.22 લાખ ટન સાથે ભારતનો સૌથી મોટો LPG સપ્લાયર રહ્યો છે, જ્યારે યુએઈ 1.40 લાખ ટન સાથે બીજા સ્થાને છે. અલ્જેરિયાનો સપ્લાય જૂનમાં માત્ર 22,244 ટન હતો જે ઓગસ્ટમાં વધીને 1.10 લાખ ટનથી વધુ થઈ ગયો છે.

પેટ્રોલિયમ અને કુદરતી ગેસ મંત્રાલયે આંતરરાષ્ટ્રીય અછતને પહોંચી વળવા માટે પ્રથમ વખત સ્થાનિક રિફાઈનરીઓ માટે LPG ઉત્પાદનના લક્ષ્યાંકો પણ નક્કી કર્યા છે. ભારત અને અલ્જેરિયા વચ્ચેનો કુલ વેપાર $1.71 બિલિયન સુધી પહોંચ્યો છે, જેમાં આ નવો ઊર્જા કરાર બંને દેશોના આર્થિક સંબંધોને એક નવી ઊંચાઈ પર લઈ જશે.