કોલકાતા : તૃણમૂલ કોંગ્રેસ (TMC) ના રાષ્ટ્રીય મહાસચિવ અભિષેક બેનર્જીએ પાર્ટી છોડીને અન્યત્ર જતા રહેલા નેતાઓ અને વિપક્ષો પર આકરા પ્રહારો કર્યા છે. ટીવીસીની વિદ્યાર્થી પાંખ 'તૃણમૂલ છાત્ર પરિષદ' ના સ્થાપના દિવસ નિમિત્તે આયોજિત એક વિશાળ રેલીને સંબોધતા તેમણે સ્પષ્ટ શબ્દોમાં કહ્યું હતું કે મુશ્કેલ સમયમાં પાર્ટી અને કાર્યકરોને વેરવિખેર મૂકીને ભાગી ગયેલા એક પણ "દેશદ્રોહી" કે પક્ષપલટુને હવે ટીએમસીમાં પાછા ફરવા દેવામાં આવશે નહીં.

અભિષેક બેનર્જીએ ભાજપ અને કેન્દ્ર સરકારને આડે હાથ લેતા યુવા શક્તિના વખાણ કર્યા હતા. તેમણે કહ્યું કે દેશના વિદ્યાર્થીઓએ સાબિત કરી દીધું છે કે તેઓ "દિલ્હીના શાસકો" ને પણ પોતાની તાકાત સામે ઝૂકવા મજબૂર કરી શકે છે. નીટ (NEET-UG) પરીક્ષાના વિવાદ અને વિદ્યાર્થી આંદોલનોનો ઉલ્લેખ કરતા તેમણે કેન્દ્ર સરકારની નીતિઓની ટીકા કરી હતી. આ સાથે જ તેમણે પશ્ચિમ બંગાળમાં ભાજપ સરકાર દ્વારા ચલાવવામાં આવતી 'અન્નપૂર્ણા યોજના' અને મમતા બેનર્જીની અગાઉની લોકપ્રિય 'લક્ષ્મી ભંડાર યોજના' ની તુલના કરતા દાવો કર્યો હતો કે ટીએમસી સરકારે વધુ બહેતર રીતે લાખો મહિલાઓને આર્થિક સહાય પૂરી પાડી છે.

પોતાના વિરોધીઓને પડકાર ફેંકતા અભિષેક બેનર્જીએ સ્પષ્ટ ચેતવણી આપી હતી કે જો વિપક્ષોમાં હિંમત હોય તો તેમણે મેદાનમાં આવીને વિદ્યાર્થીઓ અને યુવાનોનો સામનો કરવો જોઈએ. પોતાના વિરોધીઓની અટકળોને ફગાવતા તેમણે ભાવુક અંદાજમાં કહ્યું કે જ્યાં સુધી તેમના નશ્વર શરીર પર પાર્ટીનો ધ્વજ ન લહેરાય ત્યાં સુધી તેઓ રાજકારણમાંથી હાર સ્વીકારવાના નથી અને જનતાની લડાઈ લડતા રહેશે.