મુંબઈ : મુંબઈની સ્પેશિયલ પીએમએલએ (PMLA) કોર્ટે ૧,૦૦૦ કરોડ રૂપિયાથી વધુના હાઈ-પ્રોફાઈલ ગેરકાયદેસર વિદેશી રેમિટન્સ અને મની લોન્ડરિંગ કેસમાં આરોપી સંજય જૈનને મોટો ઝટકો આપ્યો છે. કોર્ટે અંદાજે નવ વર્ષ જેટલા લાંબા અને અસ્પષ્ટ વિલંબને ટાંકીને સંજય જૈનની ડિસ્ચાર્જ (મુક્તિ) અરજી પર સુનાવણી કરવાનો સ્પષ્ટ ઇનકાર કરી દીધો છે.

વર્ષ ૨૦૧૭માં નોંધાયેલા આ કેસમાં સંજય જૈન પર એવો ગંભીર આરોપ છે કે તેણે વિદેશોમાં નાણાં મોકલવા માટે બિલ ઓફ એન્ટ્રી અને ઇન્વોઇસ જેવા નકલી આયાત દસ્તાવેજોનો ઉપયોગ કર્યો હતો. ઇડી (ED) દ્વારા ચાર્જશીટ દાખલ કરવામાં આવ્યાના આટલા વર્ષો પછી અચાનક ડિસ્ચાર્જ અરજી લઈને આવેલા આરોપીના વકીલ કોર્ટના સંતોષકારક જવાબો આપી શક્યા નહોતા. વકીલે દસ્તાવેજો અધૂરા હોવાનું બહાનું ધર્યું હતું.

કોર્ટે આકરી ટીપ્પણી કરતા જણાવ્યું હતું કે આરોપી માટે અરજી કરવાનો કોઈ નિશ્ચિત સમય નથી, પરંતુ તેનો અર્થ એ નથી કે તે પોતાની મરજી મુજબ જ્યારે ઈચ્છે ત્યારે કેસને લંબાવવા માટે અરજી દાખલ કરી શકે છે. જો આ અરજીને મંજૂરી આપવામાં આવે તો કેસ દસ વર્ષ જૂનો હોવા છતાં ક્યારેય ચાર્જ ફ્રેમિંગ કે મુખ્ય સુનાવણીના તબક્કે પહોંચી જ નહીં શકે. કોર્ટે સ્પષ્ટપણે નોંધ્યું કે આરોપીનું આ વર્તન જાણી જોઈને ન્યાયિક પ્રક્રિયામાં વિલંબ પેદા કરવાનો અને કેસને ખેંચવાનો સ્પષ્ટ પ્રયાસ છે.