કાઠમંડુ: નેપાળમાં તાજેતરમાં આવેલા વિનાશક પૂર અને ભૂસ્ખલનને કારણે ભારે તારાજી સર્જાઈ છે, જેમાં અત્યાર સુધીમાં ૫૮૭થી વધુ લોકોએ પોતાના જીવ ગુમાવ્યા છે અને ૧,૯૦૦થી વધુ લોકો હજુ પણ ગુમ છે. આ દુર્ઘટના બાદ વિદેશી મદદ સ્વીકારવા અંગે ઉભેલા રાજકીય અને સામાજિક સવાલો પર નેપાળ સરકારે આખરે મૌન તોડ્યું છે. વિદેશ મંત્રી શિશિર ખાનાલે સ્પષ્ટતા કરતા જણાવ્યું છે કે નેપાળે ક્યારેય આંતરરાષ્ટ્રીય સમુદાય કે મિત્ર દેશોની મદદ માટે ના પાડી નથી, પરંતુ સ્થાનિક ભૂગોળ અને પર્વતીય પરિસ્થિતિઓને ધ્યાનમાં રાખીને પ્રારંભિક તબક્કે સ્થાનિક સેના અને પોલીસને પ્રાથમિકતા આપવામાં આવી હતી.

સરકારે વધુમાં જણાવ્યું કે અજાણ્યા પર્વતીય પ્રદેશોમાં વિદેશી રેસ્ક્યૂ ટીમોને સીધી મોકલવાથી સંકલનના અભાવ અને ટેકનિકલ પડકારો ઊભા થઈ શકે છે, જેનાથી બચાવ કામગીરીમાં નવું જોખમ ઊભું થઈ શકે તેમ હતું. સ્થાનિક નેપાળી સેના અને પોલીસ આ દુર્ગમ પર્વતીય વિસ્તારોથી સારી રીતે વાકેફ હોવાથી શરૂઆતી બચાવ કાર્ય તેમના દ્વારા હાથ ધરાયું હતું. જોકે, સરકારે સ્પષ્ટ કર્યું છે કે પુનઃનિર્માણ અને વિશિષ્ટ ટેકનિકલ ક્ષેત્રોમાં આંતરરાષ્ટ્રીય મદદ માટે દેશના દરવાજા ખુલ્લા જ છે.

પૂરના કારણે દેશના ત્રણ ડઝનથી વધુ મહત્વના પુલો ધોવાઈ જતાં સંપર્ક સંપૂર્ણપણે કપાઈ ગયો છે. આ કનેક્ટિવિટી ઝડપથી પુનઃસ્થાપિત કરવા માટે નેપાળે ભારત અને ચીન પાસે ખાસ ૪૨ 'બેઈલી બ્રિજ' (કામચલાઉ ઝડપી બનતા પુલ) બનાવવા માટે મદદ માંગી છે. ભારતે પહેલાથી જ રાહત સામગ્રીના કન્સાઈન્મેન્ટ કાઠમંડુ પહોંચાડી દીધા છે અને તમામ શક્ય મદદની ખાતરી આપી છે. હાલમાં નેપાળ સરકારની પ્રાથમિકતા ગુમ થયેલા લોકોને શોધવાની અને ક્ષતિગ્રસ્ત રસ્તાઓ ફરી શરૂ કરવાની છે.