રક્ષાબંધન કરવા પિયરે જતી પત્ની રસ્તામાંથી પ્રેમી સાથે ભાગી ગઈ
પતિ મીઠાઈ લેવા ગયો ને ખેલ થયાઃ બિહારના મધેપુરામાંથી એક ચોંકાવનારી ઘટના સામે આવી
મધેપુરા,તા.૨૯: બિહારના મધેપુરામાંથી એક ચોંકાવનારી ઘટના સામે આવી છે. રક્ષાબંધન પર પત્નીને પિયરમાં મૂકવા ગયેલા એક યુવકને ત્યારે ઝટકો લાગ્યો, જ્યારે તે મીઠાઈ લેવા ગયો અને પત્ની ગાયબ થઈ ગઈ. ભારે શોધખોળ બાદ જ્યારે પત્નીનો ક્યાંય પત્તો લાગ્યો નહીં તો પોલીસને સૂચના આપી. તપાસમાં પ્રેમ પ્રસંગની કહાની સામે આવી. પોલીસે લગભગ બે કલાકની અંદર યુવતીને પ્રેમી સાથે ઝડપી પાડી. બંનેને કાનૂની કાર્યવાહી માટે પોલીસના હવાલે કરી દેવામાં આવી છે.
આ મામલો મધેપુરા જિલ્લાના ચૌસા વિસ્તારના ચૌસા બસ સ્ટેન્ડનો છે. પોલીસના જણાવ્યા અનુસાર, ભાગલપુર જિલ્લાના નારાયણપુર વિસ્તારના ચકરામીના રહેવાસી પિન્ટુ કુમારના લગ્ન પૂર્ણિયાના બડહરા કોઠીના સુખસેનાની રહેવાસી તારાવતી કુમારી સાથે ૭ ઓગસ્ટના રોજ થયા હતા. લગ્નના લગભગ ૧૯ દિવસ બાદ રક્ષાબંધનના અવસર પર પિન્ટુ પત્નીને પિયરમાં મૂકવા માટે બાઈક લઈને નીકળ્યો હતો.
બંને જ્યારે પૂર્ણિયા-મધેપુરા બોર્ડર નજીક ચૌસા બસ સ્ટેન્ડ પાસે પહોંચ્યા તો થોડા વાર રોકાયા. આ દરમ્યાન તારાવતીએ પતિને રક્ષાબંધન માટે મીઠાઈ લાવવા કહ્યું. પિન્ટુ પત્નીને ત્યાં ઊભી રાખી નજીકની દુકાનમાં મીઠાઈ લેવા માટે ગયો. આરોપ છે કે આ દરમ્યાન તારાવતી ક્યાંક ગાયબ થઈ ગઈ.
પિન્ટુ મીઠાઈ લઈને પાછો આવ્યો તો પત્ની બાઈક પાસે નહોતી. આજુબાજુમાં શોધખોળ કરી. પણ તેનો કોઈ પત્તો લાગ્યો નહીં. ત્યાર બાદ તેણે સાસરિયાવાળાને જાણકારી આપી. પરિવારના લોકો પણ ઘટનાસ્થળે પહોંચ્યા અને શોધખોળ શરુ કરી દીધી.
ભારે શોધખોળ બાદ જ્યારે તારાવતીનો ક્યાંય પત્તો લાગ્યો નહીં તો લગભગ રાતના ૧૨ વાગ્યે પોલીસને સૂચના આપી. પોલીસની ટીમે તપાસ શરુ કરી. પોલીસે પરિવાર પાસેથી જાણકારી સાથે મોબાઈલ લોકેશન અને અન્ય પુરાવાના આધાર પર યુવતીની શોધખોળ શરુ કરી. તપાસ દરમ્યાન પોલીસે કથિત રીતે પ્રેમી ઉત્કર્ષ કુમારના પરબત્તા વિસ્તારના બોરવા સ્થિત પહોંચી. પોલીસે ઉત્કર્ષને ધરપકડમાં લઈ પૂછપરછ કરી. પૂછપરછમાં જણાવ્યું કે, તારાવતીને તેની માતાના ઘરે રાધોપુર બહતરામાં રાખી છે.
જાણકારી મળ્યા બાદ પોલીસની બીજી એક ટીમને સૂચના આપી. વૈશાલી ચોકની ટીમ રાધોપુર પહોંચી. પોલીસે લગભગ ૨ કલાકની અંદર યુવતીની ધરપકડ કરી. પોલીસે કથિત પ્રેમીને પણ ધરપકડ કરી છે. બાદમાં બંનેને આગળની કાર્યવાહી માટે પોલીસના હવાલે કરી દેવામાં આવ્યા છે.
(10:28 AM IST)
છેલ્લા 8 દિવસમાં સૌથી લોકપ્રિય 
