કિવ:  રશિયા અને યુક્રેન વચ્ચે છેલ્લા ચાર વર્ષથી વધુ સમયથી ચાલી રહેલું ભીષણ યુદ્ધ સતત ઘાતક વળાંક લઈ રહ્યું છે. કિવ નજીક આવેલ બુચા જિલ્લાના માયલા ગામમાં શનિવારે રાત્રે રશિયન ડ્રોન હુમલાને કારણે વેરહાઉસમાં આકાશને આંબી જાય તેવા ભયાનક વિસ્ફોટો અને આગની જ્વાળાઓ ફાટી નીકળી હતી. આ ભીષણ ઘટનામાં ઓછામાં ઓછા 27 લોકોના મોત થયા છે અને 42 થી વધુ લોકો ગંભીર રીતે ઘાયલ થયા છે. મૃતકોમાં લોકોની મદદ કરવા સૌથી પહેલા પહોંચેલા દિમિત્રિવકા સમુદાયના અગ્રણી વડા તારાહ દિદિચ (Taras Didych) પણ સામેલ છે. હુમલાના કારણે લાગેલી આગે આસપાસની 50 થી વધુ રહેણાંક ઇમારતો, એક રેસ્ટોરન્ટ અને વૃદ્ધો તેમજ દિવ્યાંગો માટેના હોમને પણ ભારે નુકસાન પહોંચાડ્યું છે.

આ દુર્ઘટના બાદ યુક્રેનિયન ઇમરજન્સી ટીમો અને બચાવકર્મીઓએ ઘટનાસ્થળે પહોંચીને 380 થી વધુ લોકોને આ વિસ્તારમાંથી સુરક્ષિત બહાર કાઢ્યા હતા. કિવ અને તેની આસપાસના વિસ્તારોમાં છેલ્લા સતત ત્રણ દિવસથી અવિરત હવાઈ હુમલાઓ થઈ રહ્યા છે, જેના કારણે સામાન્ય જનજીવન અને આર્થિક ગતિવિધિઓ સંપૂર્ણપણે લકવાગ્રસ્ત થઈ ગઈ છે. જોકે આ દુર્ઘટનામાં રશિયન હુમલા કરતા પણ વધુ આઘાતજનક બાબત એ સામે આવી છે કે વેરહાઉસમાં થયેલો વિસ્ફોટ એટલો શક્તિશાળી હતો કારણ કે ત્યાં ગેરકાયદેસર રીતે મોટી માત્રામાં દારૂગોળો અને વિસ્ફોટકો સંગ્રહિત કરવામાં આવ્યા હતા.

આ ઘટના પર ભારે નારાજગી વ્યક્ત કરતા યુક્રેનના રાષ્ટ્રપતિ  ઝેલેન્સકી અને વડાપ્રધાન સેરગેઈ કોરેત્સ્કીએ સ્થાનિક વહીવટીતંત્ર સામે કડક વલણ અપનાવ્યું છે. ઝેલેન્સકીએ સ્પષ્ટ શબ્દોમાં જણાવ્યું કે દેશના નિયમો અનુસાર રહેણાંક વિસ્તારો અથવા નાગરિકોની વસ્તી નજીક વિસ્ફોટકો કે દારૂગોળો રાખવાની સખત મનાઈ છે. યુદ્ધના આટલા વર્ષો પછી પણ આવી જીવલેણ ભૂલોનું પુનરાવર્તન થવું એ "ગુનાહિત બેદરકારી" છે. સરકારે આ મામલે ઉચ્ચ સ્તરીય ફોજદારી તપાસ શરૂ કરી દીધી છે અને જે પણ અધિકારીઓની બેદરકારીને કારણે 27 નાગરિકોએ જીવ ગુમાવવો પડ્યો છે તેમની સામે સખતમાં સખત કાર્યવાહી કરવાની ખાતરી આપી છે.