મુંબઈ : મહારાષ્ટ્રમાં છેલ્લા કેટલાક સમયથી ચાલી રહેલા આદિવાસી વિદ્યાર્થીઓના ઉગ્ર આંદોલન સામે આખરે દેવેન્દ્ર ફડણવીસ સરકારે નમતું જોખવું પડ્યું છે. પુણે, નાગપુર અને નાસિક જેવા મુખ્ય શહેરોમાં ભૂખ હડતાળ પર બેઠેલા અનુસૂચિત જનજાતિ (ST) ના વિદ્યાર્થીઓની તમામ મુખ્ય માંગણીઓનો રાજ્ય સરકારે સ્વીકાર કરી લીધો છે. ગઢચિરોલી જિલ્લાની એક સરકારી રહેણાંક શાળામાં સાપ કરડવાના કારણે ત્રણ આદિવાસી બાળકીઓના કમનસીબ મોત બાદ આ વિદ્રોહ ફાટી નીકળ્યો હતો.

રાજ્યના આદિજાતિ વિકાસ મંત્રી અશોક ઉઇકેએ પત્રકારોને માહિતી આપતાં જણાવ્યું હતું કે, મુખ્યમંત્રી દેવેન્દ્ર ફડણવીસે વિદ્યાર્થીઓના પ્રતિનિધિમંડળ સાથે સકારાત્મક વાતચીત કર્યા બાદ તેમની માંગણીઓ મંજૂર કરી દીધી છે. સરકારી સેવાઓમાં ST ઉમેદવારોની ભરતી, પોઈન્ટ રોસ્ટરમાં આદિવાસીઓને યોગ્ય સ્થાન આપવું તેમજ રહેણાંક શાળાઓની સુરક્ષા અને સુવિધાઓ સુધારવા અંગે મહત્વના નિર્ણયો લેવાયા છે. નિર્ણયોના અમલીકરણ અને સમીક્ષા માટે આગામી ત્રણ મહિના પછી ફરી એક સમીક્ષા બેઠક પણ યોજવામાં આવશે.

ઉલ્લેખનીય છે કે, બોમ્બે હાઈકોર્ટે પણ આ મામલે ગંભીર નોંધ લેતાં સરકારને ભૂખ હડતાળ પર બેઠેલા વિદ્યાર્થીઓના સ્વાસ્થ્ય અને કલ્યાણ માટે ત્વરિત પગલાં ભરવાનો નિર્દેશ આપ્યો હતો. પંચાયત આદિજાતિ વિસ્તાર વિસ્તારણ કાયદા (PESA) હેઠળ ખાલી પડેલી કેડરની ભરતી તાત્કાલિક શરૂ કરવાની સૂચના જારી કરવામાં આવી છે. સરકાર દ્વારા તમામ માંગણીઓ સંતોષવામાં આવતાં વિદ્યાર્થીઓએ રાહતનો શ્વાસ લીધો છે અને વિરોધ પ્રદર્શન સમેટીને અભ્યાસમાં પરત ફરવાની તૈયારી દર્શાવી છે.