મુંબઈ : દેશની આર્થિક રાજધાની મુંબઈમાં રાહદારીઓ માટે માથાનો દુખાવો બનેલા ગેરકાયદેસર કબ્જા અને અતિક્રમણ સામે બૃહન્મુંબઈ મહાનગરપાલિકા (BMC) એ મોટો મોર્ચો ખોલ્યો છે. બીએમસી દ્વારા ચલાવવામાં આવી રહેલી વિશેષ ઝુંબેશ અંતર્ગત માત્ર એક જ મહિનાના ગાળામાં શહેરના ૧૩૪ અતિક્રમણ કરાયેલા ફૂટપાથોને સંપૂર્ણપણે સાફ કરવામાં આવ્યા છે. આ કાર્યવાહીના પરિણામે મુંબઈકરો માટે લગભગ ૧૯૭ કિલોમીટર જેટલી લાંબી જગ્યા ગેરકાયદેસર કબ્જામાંથી મુક્ત થઈ છે.

આ મહા-અભિયાનના ભાગરૂપે છેલ્લા બે દિવસમાં જ નાગરિક તંત્રે ભાંડુપ રેલ્વે સ્ટેશન (પશ્ચિમ) ની આસપાસના અત્યંત વ્યસ્ત ઝોનમાં મોટી કાર્યવાહી હાથ ધરી હતી. ત્યાં ફૂટપાથ પર ગેરકાયદેસર રીતે ઉભા કરી દેવાયેલા ૯૪ અનધિકૃત સ્ટોલ્સને તોડી પાડવામાં આવ્યા હતા. આ મિશનમાં ૫ જેસીબી, ૧૦ ડમ્પર, ૫૦ થી વધુ બીએમસી અધિકારીઓ, ૧૦૦ સફાઈ કામદારો અને ૭૦ થી વધુ પોલીસ જવાનોના કાફલાને તૈનાત કરવામાં આવ્યો હતો. આ કાર્યવાહીથી હવે લાલ બહાદુર શાસ્ત્રી (LBS) માર્ગ તરફ જતા મુસાફરો માટે રસ્તો એકદમ અવરોધમુક્ત બની ગયો છે.

બીએમસીના પ્રથમ તબક્કાના લક્ષ્યાંક મુજબ તમામ ૨૬ વહીવટી વોર્ડમાં કુલ ૨૦૦ ફૂટપાથોને દબાણમુક્ત કરવાનો પ્લાન છે, જેમાંથી ૧,૪૫૯ સ્થળોએ દરોડા પાડીને ૧૩૪ ફૂટપાથ સાફ કરી દેવાયા છે. વધુમાં, ફૂટપાથને અડીને આવેલા અને અવરોધરૂપ બનતા પરવાના ધરાવતા નાગરિક સ્ટોલ્સ તેમજ આરે (Aarey) ડેરીના ૧,૬૦૩ સ્ટોલ્સમાંથી દબાણ કરતા સ્ટોલ્સને યોગ્ય પ્લોટ અથવા નિયુક્ત સ્થળોએ ખસેડવાની સમીક્ષા શરૂ કરી દેવામાં આવી છે. બીએમસી તંત્રે સ્પષ્ટ ચેતવણી આપી છે કે જાહેર રસ્તાઓ કે ફૂટપાથ પર ગેરકાયદેસર સ્ટોલ અથવા સામગ્રી મુકનારા સામે આગામી દિવસોમાં વધુ આકરા પગલાં લેવામાં આવશે.