નવી દિલ્હી : શાળાના શિક્ષકો પર ચૂંટણીલક્ષી કામગીરીના બોજ અને તેના કારણે વિદ્યાર્થીઓના શિક્ષણ પર પડતી અસરો અંગે ચાલતી કાનૂની લડાઈ વચ્ચે ભારતીય ચૂંટણી પંચ (ECI) એ દિલ્હી હાઈકોર્ટમાં મોટો ખુલાસો કર્યો છે. ચૂંટણી પંચે કોર્ટને સત્તાવાર રીતે જાણ કરી છે કે દિલ્હીમાં ચાલી રહેલા સ્પેશિયલ ઇન્ટેન્સિવ રિવિઝન (SIR) હેઠળ બૂથ લેવલ ઓફિસર (BLO) તરીકે તૈનાત કરવામાં આવેલા શિક્ષકોએ હવે માત્ર રજાના દિવસોમાં, શાળાના સમય પછી અથવા નોન-ટીચિંગ અવર્સ દરમિયાન જ ચૂંટણી સંબંધી કામગીરી કરવાની રહેશે, જેથી શાળાઓના સામાન્ય શિક્ષણ કાર્યમાં કોઈ ખલેલ ન પહોંચે.

ચૂંટણી પંચે કોર્ટ સમક્ષ સ્વીકાર્યું હતું કે ક્ષેત્રીય સ્તરે જારી કરાયેલા કેટલાક અસ્પષ્ટ આદેશોના કારણે શિક્ષકો શાળાના સમય દરમિયાન કામ કરવા અંગે મૂંઝવણમાં મુકાયા હતા. જોકે, આ ભૂલ ધ્યાને આવતાં જ તે આદેશો પાછા ખેંચી લેવામાં આવ્યા છે અથવા તેમાં જરૂરી સુધારા કરી દેવાયા છે. મુખ્ય ન્યાયાધીશ ડી.કે. ઉપાધ્યાય અને ન્યાયાધીશ તુષાર રાવ ગેડેલાની બેન્ચે અગાઉ ચિંતા વ્યક્ત કરી હતી કે છ થી આઠ કલાક ભણાવતા શિક્ષકો પર વધારાની ફરજોનો અસહ્ય તણાવ ન લાદવો જોઈએ અને 'શિક્ષણનો અધિકાર કાયદો, ૨૦૦૯' (RTE) ના નિયમોનું પાલન થવું જોઈએ.

ECI એ વર્ષ ૨૦૦૮ ના સુપ્રીમ કોર્ટના ચુકાદાનો હવાલો આપતા સ્પષ્ટ કર્યું કે તેમની નીતિ હંમેશાથી શૈક્ષણિક પ્રવૃત્તિઓ જાળવી રાખવાની રહી છે. આ ઉપરાંત, દિલ્હીના મુખ્ય ચૂંટણી અધિકારીને ૧૩ જિલ્લા ચૂંટણી અધિકારીઓ અને ૭૦ ERO ને સ્પષ્ટ પરિપત્ર જારી કરવા નિર્દેશ અપાયો છે. પંચે અરજદારોની ૧૦% શિક્ષકોની મર્યાદા નક્કી કરવાની માંગનો વિરોધ કરતા જણાવ્યું હતું કે શિક્ષકો ઉપરાંત આંગણવાડી, આશા વર્કર, ડીટીસી અને ઉત્તર રેલ્વેના કર્મચારીઓને પણ BLO તરીકે રોકવામાં આવ્યા છે, જેથી શિક્ષકો પરનું ભારણ ઓછું રહે. આ મામલે આગામી સુનાવણી ૩૧ ઓગસ્ટે હાથ ધરવામાં આવશે.