મુંબઈ, તા.31: દેશની રાજધાની દિલ્હી અને પડોશી રાજ્ય મહારાષ્ટ્રમાં ચૂંટણી પંચ દ્વારા હાથ ધરવામાં આવેલા સ્પેશિયલ ઇન્ટેન્સિવ રિવિઝન (SIR) અભિયાન હેઠળ આજે 31 ઓગસ્ટે ડ્રાફ્ટ વોટર રોલ જાહેર કરવામાં આવ્યો છે. આ નવી યાદી આવતાની સાથે જ મોટો ધડાકો થયો છે, કારણ કે લાખો મતદારોના નામ હાલ પૂરતા યાદીમાંથી બહાર થઈ ગયા છે. ઘરે-ઘરે જઈને કરાયેલી ચકાસણી, ફોર્મ જમા ન થવા, ડિજિટાઈઝેશનની બાકી પ્રક્રિયા અને સરનામું બદલાવું, મૃત્યુ કે ડુપ્લિકેટ નામ જેવા વિવિધ ટેકનિકલ કારણોસર આ નામો કાપી નાખવામાં આવ્યા છે.

ગણતરીના આંકડા અનુસાર, દિલ્હીના કુલ 1.45 કરોડ નોંધાયેલા મતદારોમાંથી 47.56 લાખથી વધુ લોકોના નામ ડ્રાફ્ટ લિસ્ટમાં નથી. દિલ્હીમાં માત્ર 97.53 લાખ મતદારોનો રેકોર્ડ જ ડિજિટાઈઝ થઈ શક્યો છે. આવી જ રીતે મહારાષ્ટ્રમાં પણ ભારે ગડબડ સામે આવી છે, જ્યાં આશરે 2 કરોડ 7 લાખ મતદારોના નામ ડ્રાફ્ટ રોલમાં સામેલ થઈ શક્યા નથી. જોકે, ચૂંટણી પંચે સ્પષ્ટ કર્યું છે કે જેમના નામ યાદીમાં નથી, તેમનો મતાધિકાર કાયમ માટે છીનવાઈ ગયો નથી.

જે નાગરિકોના નામ ડ્રાફ્ટ યાદીમાંથી ગાયબ છે, તેઓ 31 ઓગસ્ટથી 30 સપ્ટેમ્બર 2026 સુધીમાં પોતાના દાવા અને વાંધા સત્તાવાર રીતે નોંધાવી શકશે. તમામ દાવાઓનો નિકાલ 29 ઓક્ટોબર 2026 સુધીમાં કરી દેવામાં આવશે અને ત્યારબાદ 4 નવેમ્બર 2026ના રોજ આખરી (ફાઇનલ) મતદાર યાદી પ્રસિદ્ધ કરવામાં આવશે.

જો તમારું નામ પણ યાદીમાં નથી, તો ચિંતા કરવાની જરૂર નથી. તમે મહારાષ્ટ્ર કે દિલ્હીના મુખ્ય ચૂંટણી અધિકારી (CEO)ની સત્તાવાર વેબસાઇટ પર જઈને ઓનલાઇન સ્ટેટસ ચકાસી શકો છો. નવું નામ ઉમેરવા અથવા સુધારા માટે 30 સપ્ટેમ્બર પહેલા ફોર્મ 6 ભરીને જરૂરી પુરાવા સાથે સબમિટ કરવાનું રહેશે, જ્યારે કોઈ વાંધો નોંધાવવો હોય તો ફોર્મ 7 નો ઉપયોગ કરવાનો રહેશે.