મુંબઈ, તા.31: સપ્તાહના પ્રથમ કારોબારી દિવસે જ ભારતીય શેરબજારમાં મંદીનો માહોલ જોવા મળ્યો હતો. આઈટી, મેટલ, રિયલ્ટી અને મીડિયા ક્ષેત્રના શેરોમાં થયેલી ભારે વેચવાલી તેમજ નબળા વૈશ્વિક સંકેતોને કારણે સોમવારે ભારતીય બેન્ચમાર્ક સૂચકાંકો ઘટાડા સાથે બંધ થયા હતા. મધ્ય-પૂર્વના તણાવ અને ક્રૂડ ઓઇલની વધતી કિંમતોને કારણે રોકાણકારોએ સાવચેતીનું વલણ અપનાવી નફો રળવાનું વધુ મુનાસિબ માન્યું હતું.

દિવસના અંતે, બોમ્બે સ્ટોક એક્સચેન્જ (BSE)નો સેન્સેક્સ 307.24 પોઈન્ટ અથવા 0.40 ટકાના કડાકા સાથે 76,957.27 ના સ્તરે બંધ રહ્યો હતો. જ્યારે નેશનલ સ્ટોક એક્સચેન્જ (NSE)નો નિફ્ટી 95.25 પોઈન્ટ અથવા 0.39 ટકા ઘટીને 24,080.40 ની સપાટીએ આવી ગયો હતો. આજના ઘટાડામાં આઈટીસી (ITC), ભારતી એરટેલ અને એટરનલ જેવા અગ્રણી શેરોમાં થયેલું ધોવાણ મુખ્ય કારણ બન્યું હતું.

ક્ષેત્રવાર દેખાવની વાત કરીએ તો, નિફ્ટી મીડિયા, મેટલ, રિયલ્ટી અને આઈટી ઈન્ડેક્સમાં ભારે નુકસાન નોંધાયું હતું. જોકે, ઓટોમોબાઈલ અને પ્રાઇવેટ બેંકિંગ ક્ષેત્રના શેરોમાં ખરીદી નીકળતાં બજારને નીચલા સ્તરેથી થોડો ટેકો સાંપડ્યો હતો. વ્યાપક બજારમાં મિશ્ર વલણ વચ્ચે નિફ્ટી મિડકેપ ઇન્ડેક્સ 0.24 ટકા વધ્યો હતો, જ્યારે સ્મોલકેપ ઇન્ડેક્સમાં 0.74 ટકાનો ઘટાડો નોંધાયો હતો.

તજજ્ઞોના મતે ટેકનિકલ મોરચે, નિફ્ટી નજીકના ભવિષ્યમાં 24,180–24,200 ની સપાટી તરફ થોડી રિકવરી બતાવી શકે છે, પરંતુ 24,200નું સ્તર મજબૂત પ્રતિકાર (રેસિસ્ટન્સ) તરીકે કામ કરશે. જો નિફ્ટી 24,200 થી ઉપર ટકી રહે છે, તો જ વધુ 100 પોઇન્ટની તેજી શક્ય બનશે. બીજી તરફ, ઘટાડામાં 23,990 પર તાત્કાલિક સપોર્ટ મૂકવામાં આવ્યો છે; આ સ્તર તૂટશે તો બજારમાં કરેક્શન વધુ લંબાઈ શકે છે.

અન્ય વૈશ્વિક પરિબળોમાં યુએસ અને ઈરાન વચ્ચે વધી રહેલા રાજકીય તણાવને કારણે બોન્ડ યીલ્ડ અને ક્રૂડ ઓઇલમાં ઉછાળો આવ્યો છે. ઊંચા ક્રૂડ તેલના ભાવ મોંઘવારી વધારવાની અને વ્યાજદરો ઊંચા રાખવાની આશંકા જન્માવે છે, જે કોર્પોરેટ કમાણી પર નકારાત્મક અસર કરી શકે છે. રાહતના સમાચાર એ રહ્યા કે ભારતીય રૂપિયો સતત બીજા દિવસે મજબૂત થઈ 5 ઓગસ્ટ પછીના સૌથી શ્રેષ્ઠ સ્તરે બંધ થયો હતો.