કાઠમંડુ, તા.૩૧: નેપાળના ઉત્તર અને મધ્ય વિસ્તારોમાં કુદરતે એવો કહેર વર્તાવ્યો છે કે ચો તરફ માત્ર તારાજી અને ચીસિયારો જ સંભળાઈ રહ્યો છે. ૨૬ ઓગસ્ટના રોજ આવેલા વિનાશક પૂર બાદ સ્થિતિ અત્યંત ગંભીર બની ગઈ છે. આ માનવસર્જિત કે કુદરતી હોનારત વચ્ચે એક રાહતના સમાચાર સામે આવ્યા છે, જ્યાં પૂરના પાણીમાં ઘેરાયેલા રાસુવા જિલ્લાના ચિલીમે ગામમાંથી નેપાળી સેનાએ સાહસિક કામગીરી કરીને ૩ ભારતીય નાગરિકો અને તેમના એક નેપાળી સાથીદારને સુખરૂપ બચાવી લીધા છે.

દૂતાવાસે હાથ ધરી વતન વાપસીની કવાયત

નેપાળમાં ભારતીય રાજદૂત નવીન શ્રીવાસ્તવે સોશિયલ મીડિયા પ્લેટફોર્મ 'X' પર આ અંગે જાણકારી આપતા ખુશી વ્યક્ત કરી હતી. તેમણે લખ્યું કે, "#રાસુવામાં અચાનક પૂરથી ખરાબ રીતે પ્રભાવિત ચિલીમે ગામમાંથી નેપાળી સેના દ્વારા બચાવાયેલા ૩ ભારતીય નાગરિકો અને તેમના નેપાળી સાથીદારને મળ્યા. અમે નેપાળી સેનાની સમયસરની મદદ બદલ તેમનો આભાર માનીએ છીએ." આ સાથે જ કાઠમંડુ સ્થિત ભારતીય દૂતાવાસે બચાવાયેલા તમામ ભારતીયોને સલામત રીતે ભારત પરત મોકલવા માટેની તમામ સુવિધાઓ હાથ ધરી લીધી છે.

મૃત્યુઆંક ૯૦૦ને પાર, ૪,૦૦૦થી વધુ લોકો હજુ પણ ગુમ

નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટી (NDRRMA) ના તાજેતરના આંકડા અનુસાર, આ વિનાશક આપત્તિમાં અત્યાર સુધીમાં ૯૦૦થી વધુ કમનસીબ લોકોએ પોતાના જીવ ગુમાવ્યા છે, જ્યારે ૪,૦૦૦થી વધુ લોકો હજુ પણ ગુમ છે, જેમને શોધવા માટે સર્ચ ઓપરેશન ચાલુ છે.

ભારતની સ્પેશિયલ ટનલ અને ફોરેન્સિક ટીમો મેદાનમાં

મુશ્કેલીની આ ઘડીમાં ભારતે નેપાળ તરફ મદદનો હાથ લંબાવ્યો છે. ભારતીય ફોરેન્સિક ટીમે મૃતકોના અવશેષોની ઓળખ માટે DNA સેમ્પલિંગનું કામ શરૂ કરી દીધું છે. આ ઉપરાંત, ચિલીમે અને લાંગટાંગમાં હાઇડ્રોપાવર સાઇટ્સ પર ફસાયેલા લોકોને બહાર કાઢવા માટે ભારતની વિશેષ 'ટનલ રેસ્ક્યૂ ટીમ' પણ તૈનાત કરવામાં આવી છે. NDRRMA મુજબ, ભારત અને ચીનની નિષ્ણાત ટીમો વિવિધ હાઇડ્રોપાવર પ્રોજેક્ટ્સ પર ફસાયેલા ૯૩૩થી વધુ કર્મચારીઓ અને કામદારોને શોધવા માટે નેપાળી સેના સાથે મળીને ટનલોમાં બચાવ કામગીરી ચલાવી રહી છે.

હિમપ્રપાતથી ભોટેકોશી નદીમાં પૂર: રસ્તા, પુલ અને ઘરો વહી ગયા

પ્રાથમિક અહેવાલો મુજબ, નેપાળ-તિબેટ સરહદ નજીક બરફ અને ખડકો ખસવા (હિમપ્રપાત)ને કારણે અચાનક જ જળબંબાકારની સ્થિતિ સર્જાઈ હતી. આ અચાનક આવેલા પૂરે ભોટેકોશી નદી કોરિડોરમાં મોટું નુકસાન પહોંચાડ્યું છે. પૂરમાં અનેક ઘરો, મુખ્ય રસ્તાઓ અને પુલો તણાઈ ગયા છે તથા અનેક હાઇડ્રોપાવર પ્રોજેક્ટ્સ સંપૂર્ણપણે ઠપ થઈ ગયા છે. ભારતીય દૂતાવાસ હજુ પણ અસરગ્રસ્ત વિસ્તારોમાં ફસાયેલા અન્ય ભારતીયોનો સંપર્ક કરી તેમને સલામત સ્થળે ખસેડવાની કામગીરી સતત કરી રહ્યું છે.