નવી દિલ્હી: આગામી 12 અને 13 સપ્ટેમ્બરે રાજધાની નવી દિલ્હી ખાતે યોજાનારી બ્રિક્સ (BRICS) સમિટને લઈને લક્ઝરી હોટેલ માર્કેટમાં અભૂતપૂર્વ ઉછાળો જોવા મળી રહ્યો છે. વિશ્વના શક્તિશાળી દેશોના વડાઓ, વરિષ્ઠ રાજદ્વારીઓ અને વિદેશી પ્રતિનિધિમંડળોના આગમનને કારણે દિલ્હીની અગ્રણી ફાઇવ-સ્ટાર હોટેલોમાં રૂમની માંગ અકલ્પનીય સ્તરે પહોંચી ગઈ છે. 11 થી 13 સપ્ટેમ્બર દરમિયાન શહેરની મોટાભાગની પ્રીમિયમ હોટેલો સંપૂર્ણપણે 'હાઉસફુલ' થઈ ગઈ છે, જ્યારે ઉપલબ્ધ બાકીના લક્ઝરી સૂટ્સના દૈનિક ભાડા લાખો રૂપિયામાં બોલાઈ રહ્યા છે.

દિલ્હીની આઇકોનિક લક્ઝરી હોટેલ્સ જેવી કે તાજમહેલ હોટેલ, તાજ પેલેસ, ધ ઓબેરોય, ITC મૌર્ય અને ધ લીલા પેલેસમાં ઉપલબ્ધતા લગભગ શૂન્ય થઈ ગઈ છે. અહેવાલો મુજબ, તાજમહેલ હોટેલમાં કેટલાક ખાસ પ્રીમિયમ સ્વીટ્સનું ભાડું પ્રતિ રાત્રિ ₹20 લાખ સુધી પહોંચી ગયું છે, જે સામાન્ય દિવસોના દરો કરતાં કેટલાય ગણું વધારે છે. તેવી જ રીતે, ITC મૌર્યમાં મર્યાદિત રૂમ માટે રાત્રિદીઠ ₹2.55 લાખથી વધુનો દર આકારવામાં આવી રહ્યો છે. ઓનલાઈન બુકિંગ પ્લેટફોર્મ્સે પણ આ તારીખો માટે બુકિંગ સ્વીકારવાનું બંધ કરી દીધું છે.

આ આંતરરાષ્ટ્રીય ઇવેન્ટની 'બ્રિક્સ અસર' માત્ર સમિટના બે દિવસ પુરતી મર્યાદિત ન રહેતા સમગ્ર અઠવાડિયા દરમિયાન જોવા મળી રહી છે, કારણ કે વિદેશી મહેમાનો સમિટ પહેલાં જ આવી પહોંચે છે અને કાર્યક્રમ પૂર્ણ થયા બાદ પણ રોકાય છે. આ પરિસ્થિતિને કારણે સામાન્ય પ્રવાસીઓ અને કોર્પોરેટ ટ્રાવેલર્સ માટે મધ્ય દિલ્હીમાં રોકાણ શોધવું અત્યંત મુશ્કેલ બન્યું છે. હોસ્પિટાલિટી ક્ષેત્રના નિષ્ણાતોના મતે, આટલા મોટા પાયે યોજાતી વૈશ્વિક સમિટ ભારતના હોટેલ ઉદ્યોગ માટે કરોડો રૂપિયાનો આર્થિક બૂસ્ટર સાબિત થઈ રહી છે.