લખનૌ : ઉત્તર પ્રદેશના રાજકારણમાં ગરમાવો લાવતા સમાજવાદી પાર્ટીના પ્રમુખ અખિલેશ યાદવે શાસક ભાજપ સરકાર પર અત્યાર સુધીનો સૌથી તીખો હુમલો બોલ્યો છે. લખનૌ સ્થિત સપા મુખ્યાલય ખાતે આયોજિત પત્રકાર પરિષદમાં અખિલેશ યાદવે દાવો કર્યો હતો કે ઉત્તર પ્રદેશના સમગ્ર રાજકીય ઇતિહાસમાં આજે છે એટલી ભ્રષ્ટ સરકાર ક્યારેય નથી રહી. આ સાથે જ તેમણે જાહેરાત કરી હતી કે તેમની પાર્ટી મંગળવારથી સમગ્ર રાજ્યમાં બૂથ-સ્તરનું આક્રમક ચૂંટણી ઝુંબેશ શરૂ કરવા જઈ રહી છે.

JPNIC વેચવાનો અને ૨૬,૦૦૦ શાળાઓ બંધ કરવાનો આક્ષેપ

મુખ્યમંત્રી યોગી આદિત્યનાથ દ્વારા JPNIC (જયપ્રકાશ નારાયણ ઇન્ટરનેશનલ સેન્ટર) ના નિર્માણમાં લૂંટના આરોપોનો જવાબ આપતાં અખિલેશે કહ્યું કે, "સરકારે આ કિંમતી સંસ્થાને એટલી તુચ્છ રકમમાં વેચી દીધી છે જેટલી રકમ એક ઉદ્યોગપતિ પાર્કિંગમાંથી કમાઈ લે છે." તેમણે ઉમેર્યું કે ભાજપ રાજમાં સરકારી સંસ્થાઓ વેચાઈ રહી છે અને રાજ્યની ૨૬,૦૦૦થી વધુ સરકારી શાળાઓ બંધ કરી દેવાઈ છે. આ મુદ્દે સપા ૫ સપ્ટેમ્બરે 'શિક્ષક દિવસ' પર વિરોધ પ્રદર્શનો કરશે.

SIR અને મતદાર યાદીમાં ગડબડનું ષડયંત્ર

વિધાનસભા ચૂંટણી પહેલા પ્રસ્તાવિત સ્પેશિયલ ઇન્ટેન્સિવ રિવિઝન (SIR) પર પ્રશ્નો ઉઠાવતા યાદવે આરોપ લગાવ્યો કે સરકાર ચૂંટણી પંચ સાથે મળીને મતદાર યાદીમાં છેડછાડ કરી રહી છે. બહારના રાજ્યો જેવા કે બિહાર, ઝારખંડ, મધ્યપ્રદેશ અને છત્તીસગઢના લોકોને યુપીના મતદારો બનાવીને ચૂંટણી જીતવાનું ષડયંત્ર રચાઈ રહ્યું હોવાનો પણ તેમણે સનસનાટીભર્યો આરોપ મૂક્યો હતો.

STF પર 'ટોર્ચર સ્ક્વોડ' હોવાનો આરોપ અને AI વિડીયો વિવાદ

ઉત્તર પ્રદેશ પોલીસની સ્પેશિયલ ટાસ્ક ફોર્સ (STF)ને 'જાતિ આધારિત ટોર્ચર દળ' ગણાવતા અખિલેશે કહ્યું કે કસ્ટડીમાં મોતોના મામલે યુપી દેશમાં નંબર વન છે. ભાજપ સત્તામાં આવ્યા બાદ નકલી એન્કાઉન્ટરો થયા છે જેની સપા સરકાર આવ્યા બાદ તપાસ થશે. આ ઉપરાંત, તેમણે ભાજપ પર પોતાની અને પત્ની ડિમ્પલ યાદવ સામે AI (આર્ટિફિશિયલ ઇન્ટેલિજન્સ) દ્વારા બોગસ વીડિયો બનાવીને બદનામ કરવાનો પણ આક્ષેપ કર્યો હતો.

અખિલેશ યાદવે સ્પષ્ટ શબ્દોમાં જણાવ્યું કે આવનારી ચૂંટણીઓમાં યુપીમાં PDA (પછાત, દલિત અને લઘુમતી) ની સરકાર બનશે અને સપાના તમામ જિલ્લા પ્રમુખો ભાજપના ભ્રષ્ટાચારનો પર્દાફાશ કરશે.