મુંબઈ : મહારાષ્ટ્રના ધારાશિવ જિલ્લાના યેડશી ગામમાં દિવાળીના પાવન પર્વ પર ઘટેલી એક ભયાનક દુર્ઘટનાએ સમગ્ર રાજ્યને હચમચાવી દીધું છે. ૮ નવેમ્બરની મધરાતે એક કરિયાણા અને અન્ય દુકાનોમાં લાગેલી ભીષણ આગે એક જ પરિવારના છ સભ્યોના ભોગ લીધા છે. આ ગમખ્વાર અકસ્માતમાં પરિવારની બે દીકરીઓ સહિત છ લોકોના ગૂંગળામણ અને દાઝવાથી દર્દનાક મોત નિપજ્યા છે, જ્યારે એક નાનો બાળક ચમત્કારિક રીતે બચી ગયો છે અને તેની તબિયત સ્થિર હોવાનું જણાવવામાં આવી રહ્યું છે.

સૌથી વધુ હૃદયદ્રાવક બાબત એ છે કે પરિવારની બંને દીકરીઓ પુણે અને ધારાશિવમાં રહીને અભ્યાસ કરતી હતી અને દિવાળીનો તહેવાર મનાવવા માટે પોતાના વતન આવી હતી. જે તહેવાર માટે આખો પરિવાર એકત્રિત થયો હતો, તે જ તહેવાર તેમના જીવનનો અંતિમ તહેવાર સાબિત થયો. પોલીસ પ્રશાસનની પ્રાથમિક તપાસમાં એવી આશંકા વ્યક્ત કરવામાં આવી છે કે આ ભયાનક આગ દિવાળી નિમિત્તે ઘરમાં પ્રગટાવવામાં આવેલા દીવાને કારણે લાગી હશે, જોકે આગનું સાચું કારણ જાણવા માટે પોલીસ તપાસ ચાલુ રાખી રહી છે.

આ કરુણ દુર્ઘટનામાં કરંડે પરિવારના જે છ સભ્યોએ પોતાના પ્રાણ ગુમાવ્યા છે તેમની ઓળખ ઉત્તમ ત્રિંબક કરંડે (૭૫), ચંદ્રકલા ઉત્તમ કરંડે (૭૦), ગોવિંદ ઉત્તમ કરંડે (૪૭), જ્યોતિ ગોવિંદ કરંડે (૪૨), ગાયત્રી ગોવિંદ કરંડે (૧૬) અને સિદ્ધિ ગોવિંદ કરંડે (૧૫) તરીકે થઈ છે. ઘટનાસ્થળે હાજર ગ્રામીણવાસીઓએ આગની ભયાનકતા અને લોકોને બચાવવા માટે કરવામાં આવેલી કોશિશો વિશે જે વિગતો આપી છે તે રુંવાડા ઉભા કરી દે તેવી છે. પ્રત્યક્ષદર્શીઓના જણાવ્યા મુજબ, આગની શરૂઆત દુકાનના બહારના ભાગથી થઈ હતી અને જોતજોતામાં આગે વિકરાળ સ્વરૂપ ધારણ કરી લીધું હતું.

આગ એટલી ઝડપથી ફેલાઈ કે મકાનનો મુખ્ય દરવાજો પણ આગની લપેટમાં આવી ગયો, જેના કારણે ઘરની અંદર હાજર લોકો માટે બહાર નીકળવાનો તમામ રસ્તો બંધ થઈ ગયો હતો. આગની તીવ્રતાનો અંદાજ એ વાત પરથી લગાવી શકાય છે કે ઘરની સામે આવેલા નાળિયેર અને પીપળાના ઝાડ પણ ઉપર સુધી બળી ગયા હતા. દુકાનમાં કરિયાણાની સામગ્રી ઉપરાંત કોસ્મેટિક અને કપડાંનો વેપાર પણ થતો હતો, જેના કારણે ત્રણેય દુકાનોનો સામાન સંપૂર્ણપણે બળીને ખાખ થઈ ગયો છે.

સ્થાનિક લોકોના જણાવ્યા મુજબ, આગ લાગી ત્યારે પરિવારના સભ્યો ઘરના અલગ-અલગ હિસ્સામાં ગાઢ નિંદ્રામાં સૂતા હતા. પ્રથમ માળ પર સૂતેલા બે લોકોના બરાબર દાઝવાથી મોત થયા, જ્યારે ઉપરના માળ પર મોજૂદ અન્ય ચાર લોકોના જીવ ઘાતક ધુમાડાના કારણે ગૂંગળામણથી જતા રહ્યા હતા. કેટલાક મૃતદેહો એટલા હદે બળી ગયા હતા કે તેમની ઓળખ કરવી મુશ્કેલ બની ગઈ હતી.

દુર્ઘટના બાદ ગામના લોકોએ પરિવારના સભ્યોને બચાવવા માટે પોતાની પૂરી તાકાત લગાવી દીધી હતી. સ્થાનિક રહેવાસીઓનો આરોપ છે કે ફાયર બ્રિગેડની ગાડીઓ સમયસર પહોંચી શકી ન હતી, જેના કારણે આગ વધુ ભયાનક બની ગઈ. પરિસ્થિતિની ગંભીરતાને ધ્યાનમાં રાખીને ગ્રામીણવાસીઓએ જાતે જ જેસીબી અને હથોડાની મદદથી મકાનની દીવાલો તોડવાનું શરૂ કર્યું હતું. ગ્રામીણવાસીઓનું કહેવું છે કે શરૂઆતમાં ઘરની અંદરથી લોકોની મદદ માટે ચીસો પાડવાના અવાજો સંભળાઈ રહ્યા હતા, પરંતુ થોડા સમય પછી અંદરથી અવાજો આવવાના બંધ થઈ ગયા અને ત્યાં ભયાનક સન્નાટો છવાઈ ગયો હતો. ત્યારબાદ ત્યાંથી છ લોકોના મૃતદેહ બહાર કાઢવામાં આવ્યા હતા.