News of Monday, 16th November 2026
હોલીવુડમાં નવા યુગની શરૂઆત: ચાલીસ વર્ષીય અભિનેતા રોબર્ટ પેટિન્સન બન્યા સાતમા જેમ્સ બોન્ડ : ડેનિયલ ક્રેગ બાદ સંભાળશે જાસૂસ 007 નો ઐતિહાસિક વારસો
એમેઝોન એમજીએમ સ્ટુડિયો દ્વારા ફ્રેન્ચાઇઝી હસ્તગત કરાયા બાદ પ્રથમ વખત નવા બોન્ડની જાહેરાત : દિગ્દર્શક ડેનિસ વિલેન્યુવેની આગામી ફિલ્મમાં જેકબ એલોર્ડી, કેલમ ટર્નર અને નિકોલસ હોલ્ટ જેવા દાવેદારોને પાછળ છોડી ટ્વાઇલાઇટ અને બેટમેન સ્ટારે બાજી મારી

લોસ એન્જલસ: સિનેમા જગતના સૌથી પ્રખ્યાત બ્રિટિશ જાસૂસ જેમ્સ બોન્ડની આગામી ફિલ્મોમાં 007 ની ભૂમિકા કોણ ભજવશે તે અંગે વર્ષોથી ચાલી રહેલી અટકળોનો આખરે સોમવારે અંત આવ્યો છે. ટ્વાઇલાઇટ, ધ બેટમેન અને ધ ઓડિસી જેવી ફિલ્મોથી વિશ્વભરમાં જાણીતા બનેલા ૪૦ વર્ષીય અભિનેતા રોબર્ટ પેટિન્સનની નવા જેમ્સ બોન્ડ તરીકે સત્તાવાર જાહેરાત કરવામાં આવી છે. આ સાથે જ રોબર્ટ પેટિન્સન રૂપેરી પડદે જેમ્સ બોન્ડનું પાત્ર ભજવનાર સાતમા અભિનેતા બન્યા છે. નોંધનીય છે કે એમેઝોન એમજીએમ સ્ટુડિયોએ આ ફ્રેન્ચાઇઝીનું સંચાલન સંભાળ્યા બાદ આ પ્રથમ જેમ્સ બોન્ડ ફિલ્મ હશે.
દિગ્દર્શક ડેનિસ વિલેન્યુવે અને નિર્માતાઓએ વ્યક્ત કર્યો અતૂટ વિશ્વાસ:
આ મહત્વપૂર્ણ નિયુક્તિ અંગે ખુશી વ્યક્ત કરતા રોબર્ટ પેટિન્સને જણાવ્યું હતું કે સિનેમાના ઇતિહાસના સૌથી યાદગાર પાત્રોમાંના એક એવા 007 ની જવાબદારી સોંપવી તે તેમના જીવનનું સૌથી મોટું સન્માન છે અને તેમનું આ સપનું સાકાર થયું છે. તાજેતરમાં જ આગામી ફિલ્મ ડ્યુન પાર્ટ થ્રીમાં પેટિન્સનનું દિગ્દર્શન કરનાર ડેનિસ વિલેન્યુવેએ કહ્યું હતું કે ઓડિશનમાં અનેક પ્રતિભાશાળી કલાકારો જોડાયા હતા, પરંતુ જેમ્સ બોન્ડ માત્ર એક જ હોઈ શકે. તેમણે ઉમેર્યું કે પેટિન્સનમાં 007 નો શાશ્વત આત્મા અને એકદમ નવો જુસ્સો જોવા મળે છે. આ નવી ફિલ્મનું નિર્માણ સ્પાઈડર-મેન ફ્રેન્ચાઇઝીના એમી પાસ્કલ અને હેરી પોટર ફ્રેન્ચાઇઝીના ડેવિડ હેમેન દ્વારા કરવામાં આવી રહ્યું છે, જ્યારે તાન્યા લેપોઈન્ટે એક્ઝિક્યુટિવ પ્રોડ્યુસર તરીકે જોડાયા છે અને સ્ટીવન નાઈટ તેની પટકથા લખી રહ્યા છે.
અનેક દિગ્ગજ દાવેદારોને પાછળ છોડી પેટિન્સને મેળવી ભૂમિકા:
અગાઉ ડેનિયલ ક્રેગે વર્ષ ૨૦૦૬ની કેસિનો રોયલથી શરૂ કરીને ૨૦૨૧ની નો ટાઈમ ટુ ડાય સુધી કુલ પાંચ ફિલ્મોમાં જેમ્સ બોન્ડની ભૂમિકા ભજવી હતી. ત્યારબાદ લાંબા સમયથી બોન્ડ ફિલ્મોનું નિર્માણ કરતા માઈકલ જી. વિલ્સન અને બાર્બરા બ્રોકોલીએ ૨ કરોડ અમેરિકન ડોલર એટલે કે અંદાજે ૧૬૮ કરોડ ભારતીય રૂપિયામાં આ ફ્રેન્ચાઇઝીનું ક્રિએટિવ નિયંત્રણ એમેઝોન એમજીએમને વેચી દીધું હતું. નવા બોન્ડની પસંદગી માટે જેકબ એલોર્ડી, જેક લોડેન, કેલમ ટર્નર, નિકોલસ હોલ્ટ, જોશ ઓકોનોર, ટોમ ફ્રાન્સિસ, એરોન ટેલર-જોહ્ન્સન, હેરિસ ડિકિન્સન અને હેરી સ્ટાઇલ્સ જેવા નામો ચર્ચામાં હતા, પરંતુ અંતે પેટિન્સનની પસંદગી પર મહોર વાગી હતી.
વર્ષ ૨૦૨૬માં બોક્સ ઓફિસ પર શાનદાર સફળતા અને મોટી ફ્રેન્ચાઇઝીનો અનુભવ:
વર્ષ ૨૦૨૬માં બોક્સ ઓફિસ પર રોબર્ટ પેટિન્સન સૌથી વધુ માંગ ધરાવતા કલાકાર તરીકે ઉભરી આવ્યા છે. અભિનેત્રી ઝેન્ડાયા સાથેની તેમની ફિલ્મ ધ ડ્રામાએ ૨.૮ કરોડ ડોલર એટલે કે અંદાજે ૨૩૫ કરોડ રૂપિયાના બજેટ સામે વિશ્વભરમાં ૧૩.૪ કરોડ ડોલર એટલે કે અંદાજે ૧,૧૨૫ કરોડ રૂપિયાની કમાણી કરી હતી. પ્રાઇમટાઇમ ફિલ્મે ૧.૮ કરોડ ડોલર એટલે કે અંદાજે ૧૫૧ કરોડ રૂપિયાના બજેટ સામે ૬.૧ કરોડ ડોલર એટલે કે અંદાજે ૫૧૨ કરોડ રૂપિયાનો બિઝનેસ કર્યો હતો, જ્યારે ધ ઓડિસીએ ૧.૮ અબજ ડોલર એટલે કે અંદાજે ૧૫,૧૨૦ કરોડ રૂપિયાની જંગી કમાણી નોંધાવી હતી. આ ઉપરાંત ૨૦૨૨માં ધ બેટમેન ફિલ્મમાં મુખ્ય ભૂમિકા ભજવવાનો અનુભવ અને તેની સિક્વલ વર્ષ ૨૦૨૮ સુધી લંબાતા પેટિન્સન માટે જેમ્સ બોન્ડ બનવાનો માર્ગ વધુ સરળ બન્યો હતો.
(9:01 PM IST)









છેલ્લા 8 દિવસમાં સૌથી લોકપ્રિય 
