લેહ  : ભારતના મુખ્ય ન્યાયાધીશ (CJI) સુર્યા કાંત દ્વારા એવું એલાન કરવામાં આવ્યું છે કે સુપ્રીમ કોર્ટમાં લદાખ ક્ષેત્રના જે પણ કેસો લાંબી સમયથી પેન્ડિંગ પડેલા છે, તેના નિકાલ માટે એક વિશેષ બેન્ચની રચના કરવામાં આવશે. લેહ ખાતે જમ્મુ-કાશ્મીર અને લદાખ હાઇકોર્ટની નવી રચાયેલી લદાખ બેન્ચના ઉદ્ઘાટન સમારોહને સંબોધતી વખતે તેમણે આ જાહેરાત કરી હતી.

વકીલો ઓનલાઇન માધ્યમથી કરી શકશે દલીલો:
મુખ્ય ન્યાયાધીશ સુર્યા કાંતે સ્પષ્ટ કર્યું હતું કે લદાખના પેન્ડિંગ કેસોની સુનાવણી કરનાર આ વિશેષ બેન્ચ સમક્ષ લેહ અને કારગિલના સ્થાનિક વકીલો દ્વારા જ દલીલો કરવામાં આવશે. આ વકીલો જમ્મુ-કાશ્મીર અને લદાખ હાઇકોર્ટની લેહ સ્થિત બેન્ચ પરથી જ ઓનલાઇન માધ્યમથી સુપ્રીમ કોર્ટની આ વિશેષ બેન્ચ સમક્ષ હાજર રહી શકશે.

આ પાછળનો મુખ્ય ઉદ્દેશ્ય જણાવતા તેમણે ઉમેર્યું હતું કે કારગિલ અને લેહ બાર એસોસિએશનનો દરેક સભ્ય સુપ્રીમ કોર્ટ અને સુપ્રીમ કોર્ટ બાર સાથે જોડાયેલો અનુભવે. અહીંના વકીલોની ક્ષમતા અને પ્રતિભા દેશના અન્ય વકીલો જેટલી જ સક્ષમ છે, જેથી તેઓ ઉત્તમ કાનૂની સહાય પૂરી પાડવામાં કોઈપણ પ્રકારે પાછળ નથી.

ભારતના એટર્ની જનરલના સૂચન પર પ્રતિક્રિયા:
આ અગાઉ ભારતના એટર્ની જનરલ આર. વેંકટરામણીએ સૂચન કર્યું હતું કે દિલ્હીના વ્યસ્ત માહોલથી દૂર લદાખના શાંત વાતાવરણમાં ક્યારેક સુપ્રીમ કોર્ટની બંધારણીય બેન્ચે બેસવું જોઈએ. જેના પ્રત્યુત્તરમાં CJI સુર્યા કાંતે હળવાશભર્યા અંદાજમાં કહ્યું હતું કે, અહીંની અદાલતો અને તેનું ઉત્તમ વાતાવરણ જોઈને તેમને પણ એમ જ થયું કે આખી સુપ્રીમ કોર્ટ અહીં જ ખસેડી લેવામાં આવે.