બુલઢાણા, તા.૧૩: મહારાષ્ટ્રના બુલઢાણા જિલ્લામાં સમૃદ્ધિ મહામાર્ગ પર શુક્રવાર, ૧૩ નવેમ્બરના રોજ બપોરે ૧૨ વાગ્યાની આસપાસ એક ભયાનક શ્રેણીબદ્ધ અકસ્માત સર્જાયો હતો, જેમાં લોખંડના રોલ ભરેલા એક બેકાબૂ ટ્રકે ટ્રાફિકમાં ઊભેલા આશરે ૨૫ વાહનોને પાછળથી જોરદાર ટક્કર મારી હતી અને આ દુર્ઘટનામાં ૪ થી ૫ મુસાફરો ઈજાગ્રસ્ત થયા હતા.

પ્રાપ્ત વિગતો અનુસાર, અકસ્માતના આ બનાવ પહેલા મુંબઈ તરફ જતી લેન પર વહેલી સવારે એક ટેન્કર પલટી ગયું હતું અને રસ્તા પર પાવડર ફેલાઈ ગયો હતો, જેને હટાવવા તથા માર્ગ સાફ કરવા માટે પોલીસે બેરિકેડ્સ લગાવીને વાહનવ્યવહાર અટકાવ્યો હોવાથી હાઈવે પર વાહનોની લાંબી કતાર લાગી હતી.

રસ્તો ખૂલવાની રાહ જોઈને કતારમાં શાંતિથી ઊભેલા વાહનો પાછળથી પૂરપાટ ઝડપે આવેલા લોખંડના ગુંડાળા ભરેલા ટ્રક ચાલકે અચાનક બ્રેક ન મારતા એકસાથે ૨૫ જેટલા વાહનો ધડાકાભેર અથડાયા હતા, જેનાથી આગળના વાહનો એકબીજા પર ચડી ગયા હતા અને વાહનોનો રીતસર કચ્ચરઘાણ વળી ગયો હતો.

પ્રચંડ ટક્કરના કારણે આ અકસ્માતમાં ૭ થી ૮ કાર અને અન્ય વાહનો સંપૂર્ણપણે ક્ષતિગ્રસ્ત થઈ ગયા હતા, જ્યારે સદનસીબે આ ભીષણ દુર્ઘટનામાં કોઈ જાનહાનિના સમાચાર નથી પરંતુ ૪ થી ૫ લોકોને સામાન્ય તથા ગંભીર ઇજાઓ પહોંચતા તેમને સારવાર અર્થ હોસ્પિટલમાં ખસેડવામાં આવ્યા છે.

અકસ્માતને પગલે સમૃદ્ધિ મહામાર્ગ પર વાહનવ્યવહાર સંપૂર્ણપણે ઠપ્પ થઈ ગયો હતો, પરંતુ ઘટનાની જાણ થતાં જ સ્થાનિક પોલીસ તંત્ર તાત્કાલિક ઘટનાસ્થળે દોડી આવી હતી અને ક્રેનની મદદથી ક્ષતિગ્રસ્ત વાહનોને રસ્તા પરથી બાજુ પર ખસેડીને ટ્રાફિક વ્યવસ્થા પૂર્વવત કરી હતી.

સ્પષ્ટ કતાર દેખાતી હોવા છતાં ટ્રક ચાલકે વાહન કેમ ન અટકાવ્યું તે તપાસનો મુખ્ય વિષય બન્યો છે અને પ્રાથમિક આશંકા મુજબ ટ્રક ચાલક નશાની હાલતમાં હોઈ શકે છે, જેથી પોલીસે સમગ્ર મામલાની ગંભીરતાને ધ્યાનમાં રાખીને આગળની કાનૂની તપાસ સઘન બનાવી છે.