પેન્‍સિલવેનિયા,તા.૧૭: વર્ષોથી અમેરિકામાં સેટલ થયેલા મૂળ મહેસાણાના એક પરિવારે પોતાનો જવાનજોધ દીકરો ગુમાવ્‍યો છે. પેન્‍સિલવેનિયામાં બનેલી આ ઘટનામાં ૨૧ વર્ષના ક્રિશ પટેલની તાજેતરમાં જ ગોળી મારીને હત્‍યા કરવામાં આવી હતી, ક્રિશ પટેલ પોતાના મિત્રો સાથે પોતાના પિતાની ટેસ્‍લા લઈને બહાર ફરવા ગયો હતો જ્‍યાં કોઈ અજાણ્‍યા શખસે તેને શૂટ કરી દીધો હતો. મૃતકનો જન્‍મ અમેરિકામાં જ થયો હતો અને તેની આખીય ફેમિલી યુએસમાં જ સેટલ થયેલી છે.

ક્રિશની હત્‍યા લૂંટના ઈરાદે કરવામાં આવી હતી કે કેમ તેની કોઈ સ્‍પષ્ટતા નથી થઈ શકી. ક્રિશના પરિવારને ઓળખતા એક ગુજરાતીના જણાવ્‍યા અનુસાર તે એક કલાકમાં ઘરે આવી જવાનું કહીને બહાર જવા નીકળ્‍યો હતો, પરંતુ ચારેક કલાક થઈ ગયા બાદ પણ તે પરત નહોતો ફર્યો. તેના પેરેન્‍ટ્‍સ ઘરે રાહ જોઈ રહ્યા હતા તે જ વખતે પોલીસે તેમને ફોન કરીને આ બાબતે જાણકારી આપી હતી. ક્રિશ જે કાર લઈને ઘરેથી નીકળ્‍યો હતો તે તેના પિતાના નામે રજિસ્‍ટર્ડ હતી જેથી પોલીસનો ફોન તેમના પર આવ્‍યો હતો. જોકે, કેટલાક લોકોનું એવું કહેવું છે કે ક્રિશના લોકેશનને ટ્રેસ કરી તેના પેરેન્‍ટ્‍સ ક્રાઈમ સીન સુધી પહોંચ્‍યા હતા.

એક સૂત્રના જણાવ્‍યા અનુસાર ક્રિશને માથામાં ગોળી મારવામાં આવી હતી અને તેની બોડી કારમાંથી જ મળી આવી હતી. ૨૧ વર્ષના જવાનજોધ દીકરાનું આવા સંજોગોમાં મોત થતાં ક્રિશનો પરિવાર આઘાતમાં સરી પડ્‍યો છે, મૃતકની અંતિમવિધિ જુલાઈ ૧૭ના રોજ પેન્‍સિલવેનિયાના લેવિટટાઉનમાં કરવામાં આવશે. ક્રિશની હત્‍યા કરવા પાછળનો મોટિવ શું હતો તે અંગે હજુ સુધી કોઈ જ સત્તાવાર માહિતી નથી મળી શકી, તેની અંતિમવિધિનો જે મેસેજ અમને પ્રાપ્ત થયો છે તેમાં ક્રિશના ફેમિલી મેમ્‍બર્સનો કોઈ કોન્‍ટેક્‍ટ નંબર ના હોવાથી તેમનો સંપર્ક નથી કરી શકાયો અને તેની હત્‍યાના સમાચાર લોકલ મીડિયામાં પણ પબ્‍લિશ નથી થયાં.

ક્રિશ પટેલ છેલ્‍લા દસેક દિવસમાં અમેરિકામાં ગોળી વાગવાથી મોતને ભેટનારો ચોથો ભારતીય છે. આ પહેલા ફલોરિડામાં થયેલા શૂટિગમાં ગુજરાતી પિતા-પુત્ર હિતેષ પટેલ અને પાર્થ પટેલના મોત થયા હતા, જેમાં પાર્થે જ તેના પિતાને ગોળી માર્યા બાદ પોતે પણ જીવન ટૂંકાવ્‍યું હતું જ્‍યારે બીજી એક ઘટના જ્‍યોર્જિયાાં બની હતી જેમાં ઘરકંકાસમાં શીતલ વાર્જિસેન નામના ભારતીય મૂળના મહિલાને તેમના પતિએ શૂટ કરી દીધા હતા.