નવી દિલ્હી, તા. 18 : એન્ફોર્સમેન્ટ ડિરેક્ટોરેટે (ED) સોમવારે આમ આદમી પાર્ટીના નેતા દીપક સિંગલાની ₹155 કરોડના બેંક લોન ફ્રોડ સાથે સંકળાયેલા મની લોન્ડરિંગ કેસમાં ધરપકડ કરી છે. EDએ સવારથી દિલ્હી અને ગોવામાં કુલ સાત સ્થળોએ દરોડા પાડ્યા બાદ બપોરે સિંગલાની અટકાયત કરી હતી.

અધિકારીઓના જણાવ્યા મુજબ, EDની ટીમે દીપક સિંગલા, મહેશ સિંગલા, અમરિક ગિલ અને અન્ય સાથે સંકળાયેલા ઠેકાણાંઓ પર છાપેમારી કરી હતી. તપાસ દરમિયાન મળેલા દસ્તાવેજો અને અન્ય પુરાવાઓના આધારે દીપક સિંગલાને કસ્ટડીમાં લેવામાં આવ્યા. EDનો આરોપ છે કે મહેશ ટિમ્બર પ્રાઇવેટ લિમિટેડ અને તેની સાથે સંકળાયેલા લોકોએ બેંકો સાથે કથિત છેતરપિંડી કરીને આશરે ₹155 કરોડની રકમ હડપ કરી છે. એજન્સી હવે ગબન કરાયેલી રકમ કયા ખાતાઓ અને વ્યક્તિઓ સુધી પહોંચી તેની તપાસ કરી રહી છે.

દીપક સિંગલાએ 2020 અને 2025ની દિલ્હી વિધાનસભા ચૂંટણીમાં વિશ્વાસ નગર બેઠક પરથી AAPની ટિકિટ પર ચૂંટણી લડી હતી. EDએ 2024માં પણ આ જ કેસમાં સિંગલાના નિવાસસ્થાને દરોડા પાડ્યા હતા. આ કેસમાં દીપક સિંગલા ઉપરાંત મહેશ સિંગલા અને અમરિક ગિલના નામ પણ તપાસના દાયરામાં આવ્યા છે.

દરમિયાન, AAP સંયોજક અરવિંદ કેજરીવાલે ધરપકડ પર પ્રતિક્રિયા આપતા કહ્યું કે, “દીપક સિંગલાને એટલા માટે ગિરફ્તાર કરવામાં આવ્યો નથી કે તેણે કોઈ ખોટું કામ કર્યું છે, બલ્કે એટલા માટે કે તે BJP વિરુદ્ધ કામ કરી રહ્યો હતો અને BJPમાં જોડાવાની ના પાડી દીધી હતી. દીપક બહાદુર છે અને દેશ માટે લડી રહ્યો છે.”

ગોવાના AAP પ્રભારી અને પૂર્વ દિલ્હી મુખ્યમંત્રી આતિશીએ X પર પોસ્ટ કરીને આરોપ લગાવ્યો કે, “ગોવામાં આમ આદમી પાર્ટીની લોકપ્રિયતા વધતાં BJPના વફાદાર સૈનિક EDને પણ અહીં મોકલવામાં આવ્યા છે! આજે સવારથી ગોવાના સહ-પ્રભારી દીપક સિંગલાના નિવાસસ્થાને તેમજ કેટલાક સ્વયંસેવકોના ઘરે EDના દરોડા પડી રહ્યા છે.” તેમણે કહ્યું કે આ કાર્યવાહી સ્વયંસેવકોને ડરાવવા અને પાર્ટીનો સંગઠનાત્મક ડેટા BJP માટે મેળવવાનો પ્રયાસ છે.

સૂત્રોના જણાવ્યા મુજબ ગોવામાં ઉત્તર ગોવાના એક ફ્લેટ પર પણ દરોડા પાડવામાં આવ્યા છે, જ્યાં AAPની સંગઠન ટીમના કેટલાક સભ્યો રહે છે. ED હાલ નાણાકીય લેવડ-દેવડ અને સંભવિત નેટવર્કની સઘન તપાસ કરી રહી છે.