નવી દિલ્હી :   વિશ્વપ્રસિદ્ધ બેસ્ટસેલર પુસ્તક "રિચ ડેડ, પુઅર ડેડ" ના પ્રખ્યાત લેખક રોબર્ટ કિયોસાકીએ વૈશ્વિક અર્થતંત્રને લઈને એક અત્યંત કડક અને ચોંકાવનારી ચેતવણી જારી કરી છે. આશ્ચર્યજનક બાબત એ છે કે, કિયોસાકી પોતે હાલમાં આશરે ₹૧૧,૦૦૦ કરોડ ($૧.૨ બિલિયન) ના મસમોટા દેવા હેઠળ દબાયેલા છે, પરંતુ તેમણે દાવો કર્યો છે કે ઇતિહાસનું સૌથી મોટું આર્થિક સંકટ શરૂ થઈ ચૂક્યું છે. સોશિયલ મીડિયા પ્લેટફોર્મ 'X' પર તેમણે લખ્યું હતું કે યુરોપ અને જાપાનથી શરૂ થયેલી ૨૦૨૬ ની આ મહામંદી હવે ઝડપથી સમગ્ર વિશ્વને પોતાના ખોફના સાયામાં લઈ રહી છે. જો લોકો સમયસર સચેત નહીં થાય, તો ટૂંક સમયમાં બેંકો પડી ભાંગશે અને નાણાકીય બજારોમાં ભારે ગભરાટ છવાઈ જશે.

કિયોસાકીએ ખાસ કરીને ૪૦ વર્ષથી વધુ વયના લોકો અને નિવૃત્તિ ભંડોળ ધરાવતા રોકાણકારોને સાવધાન કર્યા છે. તેમના જણાવ્યા મુજબ, જે લોકોના પૈસા 401k, IRA કે અન્ય સુપરએન્યુએશન ફંડમાં રોકાયેલા છે, તેમની આખી જિંદગીની કમાણી પર ગંભીર જોખમ તોળાઈ રહ્યું છે. કૃત્રિમ બુદ્ધિ (AI) નો ઝડપી ફેલાવો, ઈરાન યુદ્ધના કારણે ઊભી થયેલી ભૂરાષ્ટ્રીય અસ્થિરતા, દેશો પર વધતું જતું દેવું અને બેબી બૂમર પેઢીની નિવૃત્તિ આ ચાર મુખ્ય કારણો છે જે બજારને તબાહી તરફ ધકેલી રહ્યા છે. ૧૯૨૯ ની મહામંદીનો ઉલ્લેખ કરતા તેમણે યાદ અપાવ્યું હતું કે તે મંદી પૂરા ૨૫ વર્ષ સુધી એટલે કે ૧૯૫૪ સુધી ચાલી હતી.

આ આર્થિક મહાપ્રલયમાંથી બચવા માટે કિયોસાકીએ સ્પષ્ટ સૂત્ર આપ્યું છે કે લોકોએ પોતાની પાસે રોકડ (કેશ) રાખવાનું તાત્કાલિક બંધ કરવું જોઈએ. સંકટ ઘેરાતા જ સરકારો અને સેન્ટ્રલ બેંકો બેફામપણે 'નકલી કાગળના પૈસા' છાપવાનું શરૂ કરશે, જેનાથી નાણાંનું મૂલ્ય શૂન્ય થઈ જશે. આ સ્થિતિમાં બચવા માટે તેમણે સોનું, ચાંદી, બિટકોઈન, રિયલ એસ્ટેટ, વ્યક્તિગત વ્યવસાયો અને તેલના કુવાઓમાં રોકાણ કરવાની સલાહ આપી છે. તેમણે અમેરિકાના કેનેડી પરિવારનું ઉદાહરણ આપતા જણાવ્યું કે મહામંદી હંમેશાં તે લોકો માટે જ નફાકારક સાબિત થાય છે જેઓ અગાઉથી તૈયાર હોય છે. આ સાથે તેમણે ૨૦૨૬ માં પ્રકાશિત મિકી મૈનીનું પુસ્તક "ધ એન્ટ્રોપી ટ્રેપ" દરેક રોકાણકારને વાંચવા વિનંતી કરી છે.