નવી દિલ્હી : દિલ્હીના રાજકારણમાં હાલમાં જંતર-મંતર પર થયેલા એક વિવાદને લઈને ભારે ગરમાવો જોવા મળી રહ્યો છે. સોશિયલ મીડિયા ઇન્ફ્લુઅન્સર નિશુ આઝાદના પિતા પર કથિત હુમલાના કેસમાં સ્વતંત્ર ભારદ્વાજની ધરપકડ કરવામાં આવ્યા બાદ આમ આદમી પાર્ટીના દિલ્હી પ્રમુખ સૌરભ ભારદ્વાજે ભારતીય જનતા પાર્ટીના નેતાઓ પર આકરા પ્રહારો કર્યા છે.

સૌરભ ભારદ્વાજે જણાવ્યું હતું કે સ્વતંત્ર ભારદ્વાજ જેને પોતાના મોટા ભાઈ ગણાવતા હતા તે યાદીમાં કપિલ મિશ્રા, ચિરાગ પાસવાન અને વડાપ્રધાન નરેન્દ્રભાઈ મોદીનું નામ સામેલ છે. તેમણે ઉમેર્યું કે સ્વતંત્ર ભારદ્વાજ વડાપ્રધાન નરેન્દ્રભાઈ મોદીના કાર્યક્રમોમાં પણ જોવા મળતા હતા અને તેમને ત્યાં જવા માટે પાસ પણ મળતા હતા, પરંતુ હવે જ્યારે પોલીસ તેમની પાછળ છે ત્યારે તેમના કથિત મોટા ભાઈઓ ગાયબ થઈ ગયા છે.

તેમણે વધુમાં જણાવ્યું હતું કે કેન્દ્ર અને અનેક રાજ્યોમાં ભાજપની સરકાર હોવા છતાં કોઈ પણ નેતા સ્વતંત્ર ભારદ્વાજના સમર્થનમાં આગળ આવ્યા નથી. ન તો કોઈ તેમના માટે વિડીયો બનાવી રહ્યું છે કે ન તો કોઈ પાર્લમેન્ટ સ્ટ્રીટ પોલીસ સ્ટેશને પહોંચીને વિરોધ પ્રદર્શન કરી રહ્યું છે. આના પરથી સ્પષ્ટ થાય છે કે રાજકીય લોકો પોતાના સ્વાર્થ માટે યુવાનોનો ઉપયોગ કરે છે પરંતુ મુશ્કેલીના સમયે પીછેહઠ કરી લે છે.

સૌરભ ભારદ્વાજે સ્વતંત્ર ભારદ્વાજને ચેતવણી આપતા કહ્યું કે સોશિયલ મીડિયા પર જે કંઈ પણ બોલવામાં આવી રહ્યું છે તે બધું જ રેકોર્ડ થઈ રહ્યું છે. લોકો સામગ્રી ડિલીટ થયા પછી પણ તેને સુરક્ષિત રાખી રહ્યા છે. નફરતના રસ્તે યુવાનોને દોરી જનારા લોકો ખુદ ખુલ્લેઆમ સાથ આપવા તૈયાર નથી હોતા.

આ વિવાદની શરૂઆત સ્વતંત્ર ભારદ્વાજના એક વાયરલ વિડીયોથી થઈ હતી જેમાં તેમણે દાવો કર્યો હતો કે 20 જુલાઈએ જંતર-મંતર પર પ્રદર્શન દરમિયાન તેમણે સંજય કુમાર પર હુમલો કર્યો હતો. આ ઘટના બાદ રાજકીય માહોલ વધુ ગરમાયો છે.