રાજકોટ : અયોધ્‍યાના ભવ્‍ય શ્રીરામ મંદિરમાં દાનમાં મળેલી રકમ અને ચંદા ચોરીના વિવાદો વચ્‍ચે હવે એક નવો જ વિસ્‍ફોટક દાવો સામે આવતા ભારે ચકચાર જાગી છે. સોશિયલ મીડિયા પર પત્રકાર સચિન ગુપ્તા દ્વારા શેર કરવામાં આવેલી વિગતો અનુસાર, રામ મંદિરમાં ચંદા ચોરીનો મામલો હવે માત્ર રોકડા પૈસા સુધી સીમિત નથી રહ્યો, પરંતુ સોના-ચાંદી અને કિમતી અષ્ટધાતુ સુધી પહોંચી ગયો છે.

ધર્મસેનાના સ્‍થાપક સંતોષ દુબેએ આ અંગે એક સનસનાટીભર્યો દાવો કર્યો છે. તેમના જણાવ્‍યા અનુસાર, વર્ષ ૧૯૮૯માં જ્‍યારે દેશભરમાં રામ મંદિર આંદોલન અંતર્ગત શિલા પૂજન અભિયાન ચાલતું હતું, ત્‍યારે દેશ-વિદેશના વિવિધ શહેરો અને ગામડાઓમાંથી શ્રદ્ધાળુઓ દ્વારા પૂજિત થઈને અયોધ્‍યા મોકલવામાં આવેલી સોના-ચાંદી, હીરા-માણીક્‍ય અને અષ્ટધાતુની બનેલી આશરે ૧૨૫૦ જેટલી પવિત્ર શિલાઓ હવે ત્‍યાંથી 'ગાયબ' થઈ ગઈ છે.

જ્‍યારે બીજી તરફ સામાન્‍ય માટી કે પથ્‍થરની શિલાઓ ઉપલબ્‍ધ છે, પરંતુ આ કિમતી ધાતુઓ અને રત્‍નોથી જાડિત શિલાઓ ગાયબ હોવાનો દાવો કરાતા રામ ભક્‍તોમાં ભારે આﾍર્ય અને આક્રોશ જોવા મળી રહ્યો છે. ચંદા ચોરીના ગંભીર આરોપો બાદ આટલી મોટી સંખ્‍યામાં પવિત્ર અને કિમતી શિલાઓ ગુમ થવાના અહેવાલોએ અયોધ્‍યાથી લઈને સમગ્ર દેશના રાજકારણ અને ધાર્મિક જગતમાં નવો ગરમાવો લાવી દીધો છે.