લખનૌ: મહાપર્વ છઠની ઉજવણી કરવા માટે વતન પરત ફરી રહેલા શ્રમિકો અને પરિવારો માટે સોમવારની સવાર કાળમુખી સાબિત થઈ હતી. આગ્રા-લખનૌ એક્સપ્રેસ વે પર મુસાફરોથી ભરેલી એક લક્ઝરી બસ અચાનક ૪૦ ફૂટ ઊંડી ખીણમાં પલટી જતાં ભારે અફરાતફરી મચી ગઈ હતી. આ ભયાનક અકસ્માતમાં મહિલાઓ અને માસૂમ બાળકો સહિત ૪૦ થી વધુ લોકો ગંભીર રીતે ઘાયલ થયા છે, જ્યારે ૩ લોકોના કરુણ મોત નીપજ્યા છે. આ બસ રાજસ્થાનના ભીવાડીથી બિહારના છપરા તરફ જઈ રહી હતી ત્યારે લખનૌ જિલ્લા મુખ્યાલયથી આશરે ૩૦ કિલોમીટર દૂર પારા પોલીસ સ્ટેશન વિસ્તારના ઝીરો પોઇન્ટ પર આ હોનારત સર્જાઈ હતી.

પ્રાથમિક તપાસ અને પ્રત્યક્ષદર્શીઓના જણાવ્યા મુજબ, એક્સપ્રેસ વે પર પૂરપાટ ઝડપે દોડતી બસનું ટાયર અચાનક ફાટતા ડ્રાઇવરે વાહન પરનો કાબુ ગુમાવ્યો હતો અને બસ રસ્તા નીચે આવેલી ૪૦ ફૂટ ઊંડી ખીણમાં ખાબકી હતી. દુર્ઘટનાની જાણ થતાં જ લખનૌ પોલીસ, ફાયર બ્રિગેડ અને SDRF ની બે ટીમો સહિત ૫૦ થી વધુ પોલીસ કર્મચારીઓ ઘટનાસ્થળે પહોંચ્યા હતા. બસમાં ફસાયેલા મુસાફરોને બહાર કાઢવા જેસીબી મશીનોનો ઉપયોગ કરાયો હતો. બચાવ કામગીરી દરમિયાન પોલીસ કર્મચારીઓ નાના બાળકોને ખોળામાં ઊંચકીને એમ્બ્યુલન્સ સુધી પહોંચાડતા જોવા મળ્યા હતા. ડીસીપી જીતેન્દ્ર કુમારના જણાવ્યા મુજબ, બસમાં કુલ ૪૨ મુસાફરો સવાર હતા, જેમાંથી ૨૯ ઘાયલોને લોકબંધુ હોસ્પિટલ અને ૧૩ ને KGMU ટ્રોમા સેન્ટરમાં ખસેડાયા હતા.

અકસ્માતમાં લોકબંધુ હોસ્પિટલમાં પહોંચતા જ એક મુસાફરને મૃત જાહેર કરાયો હતો, જ્યારે બે વ્યક્તિઓએ સારવાર દરમિયાન દમ તોડ્યો હતો. મૃતકો પૈકી એકની ઓળખ બિહારના બેગુસરાય જિલ્લાના ગઢરાના રહેવાસી શંકર રજક (૬૩) તરીકે થઈ છે. આ સિવાય ઘાયલ થયેલા ૧૨ લોકોની ઓળખ સપાટી પર આવી છે, જેમાં વૈશાલીની ચાંદની, તેની બે વર્ષની પુત્રી આરોહી અને ત્રણ વર્ષની સંધ્યા, ગોપાલગંજના બલવિંદર (૪૫) તથા જગદીશ રામ (૪૭), ઔરંગાબાદના પપ્પુ તિવારી (૧૯), છપરાના રામવિલાસ (૫૦), આઝમગઢના અભિષેક (૨૬) અને દેવલાશ (૩૯), મહારાજગંજના શ્યામદેવ (૨૪) તેમજ દેવરિયાના સાહિલ નિષાદ અને યોગીનો સમાવેશ થાય છે.

બનાવની ગંભીરતાને ધ્યાને લઈ આરોગ્ય પ્રધાન બ્રજેશ પાઠકે પોતે KGMU ટ્રોમા સેન્ટરની મુલાકાત લીધી હતી અને ઘાયલોની પરિસ્થિતિની સમીક્ષા કરી તમામ શ્રેષ્ઠ તબીબી સારવાર આપવાની ખાતરી આપી હતી. હાલમાં પોલીસે અકસ્માતગ્રસ્ત વાહનને કબ્જે કરી ટેકનિકલ તપાસ અને આગળની કાનૂની કાર્યવાહી હાથ ધરી છે. આ ઉપરાંત, આગ્રા-લખનૌ એક્સપ્રેસ વે પર વારંવાર સર્જાતા અકસ્માતોને કાયમી ધોરણે અટકાવવા માટે માર્ગ પરિવહન અને પોલીસ પ્રશાસન દ્વારા એક વિશેષ એક્શન પ્લાન તેમજ રોડ સેફ્ટી સુધારણા યોજના તૈયાર કરવામાં આવી રહી છે.